Şimali Koreya 78 ildən sonra dövlət bayrağını dəyişib
Şimali Koreya 1948-ci ildən bəri ilk dəfə dövlət bayrağının ölçü nisbətlərini dəyişdirib.
Crossmedia.az xəbər verir ki, “Yonhap” agentliyi bu barədə məlumat yayıb.
Məlumata görə, ölkənin yenilənmiş Konstitusiyasında dövlət bayrağının eni ilə hündürlüyü arasındakı nisbət 2:1-dən 1,65:1-ə endirilib.
Şimali Koreyanın “Naenara” rəsmi informasiya portalında yayımlanan Konstitusiyanın 166-cı maddəsində bayrağın hündürlüyünün eninə nisbətinin 1:1,65 olduğu göstərilib.
Beləliklə, bayrağın eni əvvəlki ölçülərlə müqayisədə qısaldılıb. Bununla belə, onun əsas dizaynı dəyişməz qalıb.
Bayraqdakı qırmızı zolaq, ağ və mavi zolaqlar, eləcə də ağ dairənin içərisindəki beşguşəli qırmızı ulduz saxlanılıb.
Qeyd olunur ki, dövlət bayrağının ölçü nisbətləri Şimali Koreyanın 1948-ci ildə yaradılmasından indiyədək dəyişdirilməmişdi.
Müşahidəçilər bu addımı ölkə lideri Kim Çen Inın hakimiyyəti dövründə yeni milli kimliyin formalaşdırılması istiqamətində həyata keçirilən dəyişikliklərlə əlaqələndirirlər.
11:31 13.11.2026
Oxunuş sayı: 43
