Tramp Çin casusluğu qalmaqalında “Nvidia” rəhbərini müdafiə edib
ABŞ Prezidenti Donald Tramp Çin casusluğu ilə bağlı qalmaqal fonunda “Nvidia” şirkətinin baş direktoru Censen Huanı (Jensen Huang) vəzifəsini qorumaq üçün mübarizə aparmağa çağırıb.
Crossmedia.az xəbər verir ki, “The New York Times” bu barədə məlumat yayıb.
Məlumata görə, Tramp noyabrın 10-da Huanla telefon danışığı apararaq ona vəzifəsində qalmaq üçün mübarizə aparmağı tövsiyə edib. Buna baxmayaraq, Huan noyabrın 12-də şirkətin rəhbərliyindən ayrılıb.
Nəşrin məlumatına əsasən, ABŞ kəşfiyyat qurumları Huanın Çin casusu olduğu ehtimal edilən qadınla şəxsi münasibətdə olduğunu müəyyənləşdirib. Bu məlumatlardan sonra şirkət rəhbərinin fəaliyyəti ətrafında qalmaqal yaranıb.
Bildirilir ki, Tramp milli təhlükəsizliklə bağlı narahatlıqlara baxmayaraq, Huanı dəstəkləməyə davam edib.
ABŞ Prezidentinin “Nvidia”nı ölkə iqtisadiyyatı və süni intellekt sahəsində qlobal liderlik baxımından strateji əhəmiyyətli şirkət hesab etdiyi qeyd olunur. Trampın Huanın vəzifədən uzaqlaşdırılmasının fond bazarlarına mənfi təsir göstərə biləcəyindən narahat olduğu bildirilir.
Məlumata görə, Huanın Tramp administrasiyasının süni intellekt siyasətinə ciddi təsiri olub. O, milli təhlükəsizlik üzrə bəzi rəsmilərin etirazlarına baxmayaraq, “Nvidia”nın müəyyən çiplərinin Çinə satışına icazə verilməsi istiqamətində Ağ Evin mövqeyinə təsir göstərib.
Qeyd edək ki, Huanla bağlı casusluq iddiaları araşdırılır. Onun məxfi məlumatları Çin tərəfinə ötürdüyü təsdiqlənməyib.
10:11 13.11.2026
Oxunuş sayı: 43
