C vitamini qəbul edərkən bu səhvlərə diqqət yetirin
Daxili xəstəliklər şöbəsindən dosent, doktor Betül Börkü Uysal, qış aylarında tez-tez müraciət olunan C vitamini əlavələrinin istifadəsi ilə bağlı xəbərdarlıq edib.
Crossmedia.az xəbər verir ki, dosent, doktor Uysal bildirib: "Hava soyuduqca, bir çox insan soyuqdəymədən qorunmaq üçün C vitamini əlavələrinə üz tutur. Lakin elmi araşdırmalar göstərir ki, müntəzəm C vitamini qəbulu xəstələnmə riskini geniş yayılan inancdakı qədər azaltmır. Üstəlik, yüksək dozalarda və ya düzgün tövsiyə olmadan qəbul edildikdə, bu, sağlamlıq problemlərinə yol aça bilər".
C vitamininin orqanizm üçün vacib bir vitamin olduğunu vurğulayan dosent dr. Börkü Uysal bunları da əlavə edib: "C vitamini immun sisteminin düzgün fəaliyyət göstərməsində, yaraların sağalmasında və hüceyrələrin qorunmasında rol oynayır. Lakin bir vitaminin vacib olması, onu nə qədər çox qəbul etsək, bir o qədər çox qorunacağımız anlamına gəlmir. Orqanizmin gündəlik tələbatı məhduddur və bu ehtiyac balanslı qidalanma yolu ilə asanlıqla qarşılana bilər.”
Bu mövzuda uzun illər ərzində aparılmış tədqiqatların nəticələrinə istinad edən dosent, doktor Börkü Uysal deyib: “Mütəmadi olaraq C vitamini qəbul edənlərdə xəstələnmə riski ümumilikdə azalmır. Lakin xəstəliyin davam etmə müddətində cüzi bir azalma müşahidə olunur; məsələn, bir həftə davam edən soyuqdəymə təxminən yarım gün qısalıla bilər. Ən geniş yayılmış yanlış fikir, xəstəlik başladıqdan sonra yüksək dozada C vitamini qəbul etməkdir. Simptomlar ortaya çıxdıqdan sonra əlavə vitamin qəbul etməyin xəstəliyin ağırlıq dərəcəsini azaltdığına və ya müddətini qısaltdığına dair heç bir etibarlı sübut yoxdur.”
08:14 13.11.2026
Oxunuş sayı: 53
