Türkiyə yeni nüvə stansiyası layihəsi üzrə Kanada ilə razılaşdı
Kanadanın mədənçilik və enerji şirkəti “AtkinsRealis” Türkiyənin nüvə enerjisi proqramının genişləndirilməsi imkanlarını araşdırmaq üçün Türkiyə Nüvə Enerjisi AŞ (TÜNAŞ) ilə razılaşma imzalayıb.
Crossmedia.az xəbər verir ki, razılaşma şirkətin törəmə qurumu “Candu Energy” tərəfindən Antalyada keçirilən COP31 iqlim sammiti çərçivəsində imzalanıb.
“Reuters” agentliyinin məlumatına əsasən, şirkət 2027-ci ilin sonunadək mümkün nüvə elektrik stansiyası layihəsi üzrə hərtərəfli texniki-iqtisadi əsaslandırma aparmağı, həmçinin ilkin mühəndislik və layihələndirmə (FEED) işlərini həyata keçirməyi planlaşdırır.
“AtkinsRealis” şirkətinin nüvə enerjisi bölməsinin rəhbəri Co St. Julian “Reuters”ə açıqlamasında bildirib ki, tərəflər Türkiyədə ümumi gücü 4,5 giqavat olan, altı reaktordan ibarət nüvə elektrik stansiyasının tikintisi imkanlarını müzakirə edirlər.
Qeyd edək ki, imzalanan razılaşma hələ tikinti qərarı demək deyil. Hazırda layihənin həyata keçirilməsinin mümkünlüyü və texniki detalları qiymətləndirilir.
23:10 12.11.2026
Oxunuş sayı: 45
