ABŞ elçiləri Putinlə görüşdü: Növbəti ünvan Zelenskidir
ABŞ Prezidenti Donald Trampın xüsusi elçiləri Stiv Uitkoff və Cared Kuşner Ukraynadakı müharibənin dayandırılması ilə bağlı müzakirələr aparmaq üçün Moskvada Rusiya Prezidenti Vladimir Putinlə görüşüblər.
Crossmedia.az xəbər verir ki, CNN-in məlumatına görə, görüş ABŞ, Rusiya və Ukrayna nümayəndələrinin Əbu-Dabidə keçirdiyi iki günlük danışıqlardan sonra baş tutub.
Həmin müzakirələrdə tərəflər əsirlərin genişmiqyaslı mübadiləsi ilə bağlı razılığa gəlsələr də, müharibənin dayandırılması məsələsində ciddi irəliləyiş əldə olunmayıb.
Kuşner Moskva görüşünün əsas məqsədlərindən birinin Avropa ölkələrini də danışıqlar prosesinə cəlb etmək olduğunu bildirib. Rusiya isə indiyədək Avropa nümayəndələrinin birbaşa danışıqlarda iştirakına qarşı çıxıb.
Putinlə görüşdən sonra ABŞ nümayəndələrinin İrlandiyanın paytaxtı Dublində Ukrayna Prezidenti Volodimir Zelenski ilə də görüşməsi gözlənilir. Tərəflərin Moskvada müzakirə olunan məsələləri Ukrayna liderinə çatdıracağı bildirilir.
Beləliklə, Vaşinqtonun vasitəçiliyi ilə müharibənin dayandırılması istiqamətində diplomatik təmaslar davam edir.
21:57 12.11.2026
Oxunuş sayı: 42
