Uitkoff Zelenski ilə sülh şərtlərini müzakirə edəcək
ABŞ Prezidentinin xüsusi nümayəndəsi Stiv Uitkoff Ukrayna Prezidenti Volodimir Zelenskini Rusiya ilə razılaşdırılmış sülh şərtlərini qəbul etməyə razı salmağa çalışacağını vəd edib.
Crossmedia.az xəbər verir ki, bu barədə “Lenta.ru” nəşri məlumat yayıb.
Məlumata görə, ABŞ nümayəndələri Stiv Uitkoff və Donald Trampın kürəkəni Cared Kuşner noyabrın 12-də Moskvada Rusiya Prezidenti Vladimir Putinlə görüşüblər. Görüşdə Ukraynada müharibənin dayandırılması və sülh danışıqlarının perspektivləri müzakirə olunub.
Görüşdən sonra Uitkoff növbəti üçtərəfli danışıqlar raundunun keçirilməsi ilə bağlı razılıq əldə olunduğunu bildirib. Onun sözlərinə görə, növbəti görüşdə Avropa nümayəndələrinin də iştirakı nəzərdə tutulur.
Qeyd edək ki, bundan əvvəl Birləşmiş Ərəb Əmirliklərinin paytaxtı Əbu-Dabidə ABŞ, Rusiya və Ukrayna nümayəndə heyətləri arasında iki gün davam edən danışıqlar keçirilib. Tərəflər hərbi əsirlərin genişmiqyaslı mübadiləsi ilə bağlı razılığa gəlsələr də, ərazi məsələləri də daxil olmaqla, əsas mübahisəli mövzularda irəliləyiş əldə olunmayıb.
ABŞ nümayəndələrinin Moskva səfərindən sonra İrlandiyanın paytaxtı Dublində Volodimir Zelenski ilə də görüşməsi planlaşdırılıb.
23:34 12.11.2026
Oxunuş sayı: 36
