Süni intellektlə bağlı yeni təhlükə: Şirkətlər düşüncələrimizi yönləndirə bilər
ABŞ-ın məlumat analitikası və proqram təminatı şirkəti “Palantir”in baş icraçı direktoru Aleksandr Karp şəxsi məlumatlara nəzarət edən texnologiya şirkətlərinin insanların düşüncələrini də idarə edə və ya onlara ciddi təsir göstərə biləcəyini bildirib.
Crossmedia.az xəbər verir ki, Karp bu barədə amerikalı jurnalist Uolter Ayzeksonun təqdim etdiyi proqramda danışıb.
O qeyd edib ki, insanlar dövlət nəzarətindən narahat olsalar da, texnologiya şirkətlərinin topladığı məlumatların onların düşüncələrinə təsirini kifayət qədər qiymətləndirmirlər.
Karpın sözlərinə görə, süni intellektin ən təhlükəli tətbiq sahələrindən biri müşahidə texnologiyalarıdır. O, bu sistemlərin həm şirkətlər, həm də hökumətlər tərəfindən istifadə oluna biləcəyini vurğulayaraq, bəzi texnologiyalara məhdudiyyətlərin qoyulmasını dəstəklədiyini bildirib.
“Palantir” rəhbəri həmçinin süni intellektin iqtisadi bərabərsizliyi dərinləşdirə biləcəyini, eyni zamanda bəzi peşə sahələrində yeni iş imkanları yaradacağını qeyd edib.
06:32 13.11.2026
Oxunuş sayı: 97
