“Microsoft” xidmətlərində qlobal nasazlıq – Milyonlarla istifadəçi təsirlənib
“Microsoft”un xidmətlərində baş verən genişmiqyaslı texniki nasazlıq nəticəsində dünyanın ən azı 74 ölkə və ərazisində istifadəçilər “Outlook”, “Teams” və digər platformalara girişdə çətinliklərlə üzləşiblər.
Crossmedia.az xəbər verir ki, “Reuters” agentliyi bu barədə məlumat yayıb.
Noyabrın 12-də başlayan və 12 saatdan çox davam edən nasazlıq bankların, dövlət qurumlarının, məhkəmələrin, aviaşirkətlərin və digər təşkilatların fəaliyyətinə təsir göstərib.
Problemlər əsasən “Microsoft 365” xidmətlərini, o cümlədən “Outlook”, “Teams” və “Copilot” platformalarını əhatə edib. Bir çox istifadəçi elektron məktubların göndərilməsi və qəbulunda, eləcə də hesablarına giriş zamanı çətinliklərlə qarşılaşıb.
İnternet xidmətlərində nasazlıqları izləyən “Downdetector” platformasının məlumatına görə, problem ən azı 74 ölkə və ərazidə qeydə alınıb. ABŞ-də nasazlıqla bağlı şikayətlərin sayı pik saatlarda 130 mini keçib.
“Microsoft” açıqlamasında bəzi serverlərin fəaliyyətinin bərpa edildiyini və ayrı-ayrı regionlarda qismən yaxşılaşma müşahidə olunduğunu bildirib.
Bununla belə, şirkət görülən tədbirlərin davamlı nəticə vermədiyini və xidmətlərin tam bərpası istiqamətində işlərin davam etdiyini açıqlayıb.
İlkin araşdırmalara əsasən, nasazlığın serverlərin həddindən artıq yüklənməsi və infrastruktur problemləri ilə əlaqəli olduğu bildirilir.
Şirkət hadisənin kiberhücum nəticəsində baş verdiyinə dair hər hansı əlamət aşkarlanmadığını qeyd edib.
11:26 13.11.2026
Oxunuş sayı: 41
