Çin Tayvan ətrafında 100-dən çox hərbi gəmi ilə təlim keçirib
Çin noyabrın əvvəlində Tayvan ətrafında və Sakit okeanın qərb hissəsində 100-dən çox hərbi və sahil mühafizə gəmisinin iştirakı ilə genişmiqyaslı hərbi təlimlər keçirib.
Crossmedia.az xəbər verir ki, “Reuters” agentliyi bu barədə məlumat yayıb.
Məlumata görə, əvvəlcədən elan edilməyən təlimlər zamanı Tayvana və digər hərbi hədəflərə qarşı şərti hücumlar, dəniz blokadası və regionda genişmiqyaslı hərbi əməliyyatlar sınaqdan keçirilib.
Tayvan rəsmiləri Çinin bu fəaliyyətini “səssiz hədə-qorxu” kimi qiymətləndiriblər.
Təhlükəsizlik rəsmilərindən birinin sözlərinə görə, təlimlərin ən intensiv mərhələsində bölgəyə 100-dən çox hərbi və sahil mühafizə gəmisi cəlb olunub.
Bildirilib ki, təlimlərə Çinin şərq, şimal və cənub hərbi komandanlıqlarının dəniz qüvvələri qatılıb.
Tayvan rəsmilərinin məlumatına əsasən, təlimlər zamanı Çin sualtı qayığı Sarı dənizdən ölkənin materik hissəsi istiqamətində qitələrarası ballistik raket də buraxıb. Bu məlumat Çin tərəfindən təsdiqlənməyib.
Noyabrın 13-nə olan məlumata görə, bölgədə fəaliyyət göstərən Çin gəmilərinin sayı təxminən 70-ə enib. Bununla belə, “Liaoning” aviadaşıyıcısının rəhbərlik etdiyi hərbi gəmi qrupu və digər dəniz qüvvələri regionda fəaliyyətini davam etdirib.
Çinin Müdafiə Nazirliyi genişmiqyaslı təlimlərlə bağlı sorğunu cavablandırmayıb. Pekin isə aviadaşıyıcının fəaliyyətini hər hansı ölkəyə qarşı yönəlməyən adi hərbi təlim kimi təqdim edib.
Qeyd olunur ki, hərbi təlimlər noyabrın 18–19-da Çinin Şençjen şəhərində keçiriləcək Asiya-Sakit Okean İqtisadi Əməkdaşlıq Təşkilatının (APEC) sammiti ərəfəsinə təsadüf edir.
Sammit çərçivəsində ABŞ Prezidenti Donald Trampla Çin lideri Si Cinpin arasında görüşün keçiriləcəyi gözlənilir.
13:02 13.11.2026
Oxunuş sayı: 34
