Gündəm

İran yenə "suları bulandırır": Münasibətlər pisləşə bilər

İranın vitse-prezidentinin Ermənistanda yerləşən Göy məscidin mərasim zalının açılışında iştirakı və həmin zala erməni şairinin adının verilməsi Azərbaycanda ciddi suallar doğurub. Tarixi mənbələrdə İrəvan xanlığı dövrünə aid Azərbaycan memarlıq irsi kimi təqdim olunan məscidlə bağlı bu addım təkcə mədəni irs məsələsi deyil, həm də Azərbaycan-İran münasibətləri kontekstində müzakirələrə səbəb olub. Xüsusilə Azərbaycanın dəfələrlə mehriban qonşuluq və dostluq mövqeyi nümayiş etdirdiyi bir vaxtda Tehranın bu prosesdə iştirakı diqqət çəkir. Bəs İranın bu addımının arxasında hansı siyasi məqsədlər dayanır? Tarixi Azərbaycan abidəsinin təqdimatında bu cür yanaşma hansı mesajları ehtiva edir və bunun Bakı-Tehran münasibətlərinə mümkün təsirləri nədən ibarət ola bilər?

Mövzu ilə bağlı Milli Məclisin deputatı Ceyhun Məmmədov Crossmedia.az-a açıqlama verib:

“Təəssüflər olsun ki, bu cür addımlar və cəhdləri ilk deyil: İran davamlı olaraq bu istiqamətdə müəyyən addımlar atır. İranın vitse-prezidenti Seyid Həmid Qurbanməddinin həmin açılış mərasimində iştirak etməsi də, həqiqətən, düşündürücüdür.

Diqqətçəkən digər məqam isə məscidin mərasim zalında erməni şairinin büstünün qoyulacağının bildirilməsidir. Məscidlə erməni şairinin nə əlaqəsi var? Ümumiyyətlə, bu, anlaşılması çətin olan məsələdir. Sözügedən məscid İrəvan xanlığı dövründə inşa edilib. Bu, Səfəvilər hakimiyyəti dövründən gələn tarixi irslə bağlı, Azərbaycan xalqına və türk tarixinə məxsus bir məsciddir. Məscidin mərasim zalına müsəlman olmayan bir şəxsin adının verilməsi və orada onun büstünün qoyulması olduqca qəribə yanaşmadır. Dünyanın başqa yerlərində də buna bənzər nümunələrin olub-olmaması sual doğurur. Belə hallara, görünür, İran-Ermənistan münasibətləri kontekstində rast gəlirik”.

Deputat qeyd edib ki, əgər məscidin mərasim zalına hansısa şairin adı verilməli idisə, Azərbaycan şairlərindən birinin adı seçilə bilərdi: “Erməni şairinin bu məscidə nə aidiyyəti var? Xüsusilə də İran vitse-prezidentinin belə bir açılış mərasimində iştirak etməsi ciddi suallar yaradır. Bu iştirak həmin addımın İran dövlətinin mövqeyi ilə əlaqəli olduğu qənaətini gücləndirir. Bütün bunlar, qeyd etdiyimiz kimi, qəribə, qəbuledilməz və anlaşılan olmayan bir yanaşmadır. Eyni zamanda, belə addımlar Azərbaycan-İran münasibətlərinə də xələl gətirə biləcək xarakter daşıyır”.

Ayhan

Mövzular:

İran Göy məscid Ermənistan Seyid Həmid Qurbanməmməd məscid Azərbaycan-İran münasibətləri

🖨 Çap et

12:00 13.11.2026

Oxunuş sayı: 36