Keçmiş israilli general: “İsrail geri dönməz süqut təhlükəsi ilə üz-üzədir”
İsrail ordusunun ehtiyatda olan general-mayoru İtzhak Brik ölkənin hərbi, iqtisadi və institusional sahələrdə dərin böhranla üzləşdiyini və geri dönməz süqut təhlükəsi ilə qarşı-qarşıya qaldığını bildirib.
Crossmedia.az xəbər verir ki, bu barədə İsrailin “Maariv” qəzetinə istinadən məlumat yayıb.
Brikin fikrincə, İsraildəki vəziyyət adi siyasi böhran çərçivəsini aşaraq dövlətin müxtəlif sahələrini əhatə edən sistemli tənəzzülə çevrilib. O, ötən həftə keçirilən parlament seçkilərinin nəticələrini “tanıdığımız İsrail dövlətinin rəsmi ölüm şəhadətnaməsi” adlandırıb.
Keçmiş general bildirib ki, İsrail beynəlxalq legitimliyini və müttəfiqlərinin dəstəyini itirir. Onun sözlərinə görə, ölkənin uzun müddət beynəlxalq təcrid şəraitində yaşaması mümkün deyil.
Brik İsrail ordusunun quru qoşunlarının struktur problemləri və mənəvi-psixoloji tükənmə ilə üzləşdiyini də iddia edib. O hesab edir ki, ordu ölkənin həm daxilindən, həm də xaricindən yarana biləcək eyni vaxtlı təhdidlərə qarşı effektiv müdafiəni təmin etməkdə çətinlik çəkə bilər.
General-mayorun sözlərinə görə, uzunmüddətli müharibə İsrailin dövlət borcunun 1,4 trilyon şekelə (445 milyard dollar) çatmasına səbəb olub. O, iqtisadi sanksiyaların, silah tədarükünə qoyulan məhdudiyyətlərin və maliyyə təcridinin ölkə üzərindəki təzyiqi artırdığını bildirib.
Brik İsrailin baş naziri Benyamin Netanyahunun mümkün Avropa sanksiyalarına qarşı kriptovalyutalardan istifadə etmək təklifini də tənqid edib. O, vəziyyətin daha da pisləşməsinin İsrail vətəndaşlarının əmanətləri üçün təhlükə yarada biləcəyini vurğulayıb.
Keçmiş hərbçi ölkə daxilindəki ictimai parçalanmaya da diqqət çəkib. Onun fikrincə, İsrail cəmiyyətindəki vəziyyət sadəcə siyasi qütbləşmə deyil, “səssiz vətəndaş müharibəsi” xarakteri alıb.
Brik həkimlərin, alimlərin, texnologiya sahəsində çalışan sahibkarların və digər ixtisaslı mütəxəssislərin ölkəni tərk etdiyini iddia edib. Onun sözlərinə görə, bu proses onilliklər ərzində formalaşmış peşəkar potensialın itirilməsinə gətirib çıxarır.
O, siyasi rəhbərliyi hüququn aliliyini və dövlət institutlarını zəiflətməkdə ittiham edib. Brikin fikrincə, dövlət idarəçiliyində peşəkarlıq və dürüstlük əvəzinə siyasi təyinatlara və qeyd-şərtsiz sədaqətə üstünlük verilməsi ölkəyə ciddi zərər vurur.
09:15 02.11.2026
Oxunuş sayı: 57
