Cəmiyyət

60 yaşdan sonra nikah: Sevgi, tənhalıq, yoxsa maddi zərurət?

Ailə qurmaq cəmiyyətimizdə ənənəvi olaraq gənclik dövrü ilə əlaqələndirilsə də, son illərdə bu yanaşmanın dəyişdiyini göstərən maraqlı tendensiyalar müşahidə olunur. İnsanların həyat tərzi, sosial münasibətləri, ailə dəyərləri və şəxsi seçimləri dəyişdikcə nikah yaşına dair təsəvvürlər də əvvəlki çərçivələrdən kənara çıxır. Artıq ailə qurmaq yalnız gənclərin həyatında baş verən hadisə kimi qəbul edilmir. Ötən il Azərbaycanda 60 yaşdan yuxarı şəxslər arasında nikaha daxil olanların sayının 300-ü keçməsi də bu baxımdan diqqətçəkən göstəricidir.

Bu rəqəm cəmiyyətdə yaşlı insanların ailə və münasibətlərə baxışını, tək yaşamaqla bağlı seçimlərini və həyatın sonrakı mərhələsində yeni münasibətlər qurmaq istəyini müzakirəyə çıxarır. Bəziləri üçün bu yaşda nikah yenidən sevgi və ailə həyatı qurmaq, həyatını bir insanla bölüşmək deməkdir. Digərləri üçün isə burada sosial təminat, qarşılıqlı qayğı, tənhalıqdan uzaqlaşmaq və gündəlik həyatda mənəvi dəstək ehtiyacı mühüm rol oynaya bilər. Eyni zamanda, yaşlı insanların gec yaşda ailə qurmasına cəmiyyətin münasibəti, övladların bu qərara yanaşması və ənənəvi düşüncələrin təsiri də mövzunun sosial tərəflərini ortaya qoyur.

Bəs 60 yaşdan sonra nikaha marağın arxasında hansı sosial və psixoloji amillər dayanır?

Məsələ ilə bağlı sosioloq Əhməd Rəhmanov bildirib ki, son 40 ildə övladlar əksər halda öz valideynlərinin maddi ehtiyaclarını ödəyə bilmir:

“Bunun bir neçə səbəbi var. İlk növbədə, cəmiyyətin istehlakçı cəmiyyətə çevrilməsini qeyd etmək olar. Belə ki, gündəlik xərclər kifayət qədər çoxdur. İkinci səbəb iş yerlərinin və əməkhaqlarının az olmasıdır. Digər mühüm amil isə Azərbaycanda sadə vətəndaşların aldığı pensiyanın aşağı səviyyədə olmasıdır. Xüsusilə ailədə əlilliyi olan şəxs varsa, bu vəziyyət daha da çətinləşir. Məsələn, birinci qrup əlilliyi olan şəxsə və ona qulluq edən şəxsə verilən müavinət real yaşayış xərclərini qarşılamaq üçün ən azı 200 manat azdır.

Bütün bu amillər yaşlı insanların övladlarına yük olmamaq üçün bir araya gəlməsinə səbəb olur. Yəni onlar gələcəkdə əldə edəcəkləri pensiyaları birləşdirərək birgə yaşamağa üstünlük verirlər.

Bu gün orta statistik ailədə elə vəziyyət yaranıb ki, ailənin bütün üzvləri işləməlidir ki, heç olmasa ildə bir dəfə ölkə daxilində istirahət etmək imkanı əldə edə bilsinlər.

Yaşlı nəslin nümayəndələrinin ailə qurmasına gəlincə, cəmiyyətdə bu hal normal qarşılanır. Bunun əsas səbəbləri də yuxarıda qeyd olunan sosial və iqtisadi amillərlə bağlıdır”.

Mövzular:

yaşlı insanların nikahı 60 yaşdan sonra ailə qurmaq Azərbaycanda nikah gec yaşda evlilik pensiya sosial təminat tənhalıq ailə dəyərləri

🖨 Çap et

10:00 02.11.2026

Oxunuş sayı: 273