İqtisadiyyat

Bu hallarda kredit borcunuz silinə bilər

Bankdan kredit götürən vətəndaş üçün borcun qaytarılması öhdəliyi bəzən ciddi maliyyə çətinliyinə çevrilir. İş yerini itirmək, gəlirlərin azalması, sağlamlıq problemləri və digər gözlənilməz hallar kredit ödənişlərinin gecikməsinə, hətta borcun uzun müddət ödənilməməsinə səbəb ola bilər. Belə vəziyyətlərdə vətəndaşların bir qismi borcun müəyyən müddətdən sonra avtomatik silinəcəyini düşünür. Ancaq kredit borcunun yaranma müddəti, ödənişlərin gecikməsi və ya məhkəmə prosesinin başlanması öz-özlüyündə borcun ləğvi demək deyil.

Qanunvericilikdə müəyyən hallarda borc öhdəliyinə xitam verilməsi, borcun tam və ya qismən bağışlanması, kreditorla razılaşma əsasında ödəniş şərtlərinin dəyişdirilməsi kimi imkanlar mövcuddur. Bununla yanaşı, borclunun vəfat etməsi, iddia müddətinin keçməsi, bankın borcu güzəşt etməsi və ya məhkəmə qərarları kimi hallar da ayrıca hüquqi qiymətləndirmə tələb edir. Hər bir vəziyyətdə borcun hansı əsasla və hansı prosedurla ləğv edilə biləcəyi fərqli ola bilər.

Digər tərəfdən, kredit borcunu ödəyə bilməyən vətəndaşların hüquq və vəzifələri, bankın borcun tutulması üçün görə biləcəyi tədbirlər, zaminlərin məsuliyyəti və girov qoyulmuş əmlakın taleyi də diqqət çəkən məsələlərdəndir. Xüsusilə iddia müddətinin keçməsinin borcu avtomatik aradan qaldırmadığını və bunun hüquqi nəticələrinin konkret vəziyyətdən asılı olduğunu nəzərə almaq vacibdir.

Mövzu ilə bağlı hüquqşünas Ramil Süleymanov Crossmedia.az-a açıqlamasında bildirib ki, kredit müqaviləsi üzrə sonuncu ödənişdən sonra üç il müddət keçərsə və bank bu müddət ərzində borcla bağlı hər hansı bildiriş və ya pretenziya məktubu göndərməzsə, məhkəməyə müraciət etməzsə, iddia müddəti məsələsi gündəmə gəlir:

“Eyni zamanda, kredit müqaviləsinin müddəti başa çatdıqdan sonra üç il ərzində bank tərəfindən borcun tələb edilməsi istiqamətində hər hansı addım atılmayıbsa, vətəndaşın iddia müddətinin keçməsi ilə bağlı məhkəməyə ərizə təqdim etmək hüququ var. Hətta bank həmin müddətdən sonra məhkəməyə iddia ərizəsi ilə müraciət etsə belə, vətəndaş iddia müddətinin tətbiq olunmasını tələb edə bilər.

Şəxs vəfat etdikdən sonra onun vərəsələri həmin şəxsin hər hansı əmlakını qəbul ediblərsə, kreditorlar qarşısındakı öhdəlikləri də qəbul etdikləri əmlakın dəyərinə və həmin əmlakdakı paylarına mütənasib şəkildə daşıyırlar.

Vətəndaş üzərinə götürdüyü kredit öhdəliklərini yerinə yetirməzsə, bank bununla bağlı məhkəməyə müraciət edə bilər. Məhkəmənin çıxardığı qərar və ya qətnamə vətəndaş tərəfindən icra edilmədikdə isə qanunvericilikdə nəzərdə tutulan hallardan asılı olaraq, onu inzibati və ya cinayət məsuliyyəti gözləyə bilər.

Vətəndaş krediti ödəməkdə çətinlik çəkirsə, bununla bağlı banka müraciət edə və borcun restrukturizasiyasını xahiş edə bilər. Lakin bankın bu müraciəti qəbul edib-etməməsi onun öz hüququ və qərarıdır. Bank borcun restrukturizasiyasına razılıq verə də bilər, verməyə də bilər”.

Mövzular:

kredit borcu bank krediti iddia müddəti üçillik müddət kredit ödənişi borcun silinməsi borcun restrukturizasiyası vərəsəlik

🖨 Çap et

11:00 02.11.2026

Oxunuş sayı: 227