Firudin Qurbanov: Böyüklərin fikir ayrılığına görə uşaqlar təhsildən geri qalmamalıdır
Valideynlər arasında yaranan fikir ayrılıqları uşaqların təhsildən yayınmasına səbəb olmamalıdır.
Crossmedia.az xəbər verir ki, bu barədə Azərbaycan Respublikasının elm və təhsil nazirinin müavini Firudin qurbanov APA-ya müsahibəsində bildirib.
O, ilk növbədə valideynlərə müraciət edərək uşaqların məktəbə davamiyyətinin vacibliyini vurğulayıb.
“Böyüklər arasında hansı fikir ayrılığı yaranırsa-yaransın, onun nəticəsini uşaqlar təhsildən geri qalmaqla yaşamamalıdırlar. Qanunvericiliyə görə, hər bir valideyn övladının dərsə davamiyyətinə, məktəbin qaydalarına əməl etməsinə və tərbiyəsinə görə məsuliyyət daşıyır”, – deyə o bildirib.
Müsahib qeyd edib ki, dərslərə davamlı gəlməmək şagirdlərin biliklərində boşluqlar yaradır, onların qiymətləndirilməsinə və növbəti təhsil mərhələsinə keçməsinə təsir göstərir. Bu səbəbdən maarifləndirmə işlərinə üstünlük verilməlidir.
Müəllimlərin geyim qaydalarına riayət etməsi məsələsinə də toxunan müsahib bildirib ki, bu məsələ əmək münasibətləri və qanunvericiliklə tənzimlənir.
Onun sözlərinə görə, geyimlə bağlı müəyyən edilmiş tələblərə əməl olunması müəllimlərin peşə fəaliyyəti, əmək intizamı və əmək müqaviləsi üzrə öhdəliklərinin tərkib hissəsidir.
“Üzrlü səbəb olmadan işə çıxmamaq, əmək funksiyalarını yerinə yetirməmək və ya intizam tələblərinin təkrar pozulması qəbulolunmazdır, qanunazidd hərəkət kimi dəyərləndirilir”, – deyə o vurğulayıb.
Müsahib müəllimlərin böyük əksəriyyətinin müəyyən edilmiş qaydalara əməl etdiyini və tədris fəaliyyətini davam etdirdiyini də diqqətə çatdırıb.
“Gözləntimiz bundan ibarətdir ki, müəllimlərimiz bu məsuliyyətli məqamda məktəb və şagirdlərinin yanında olacaqlar, vəzifə öhdəliklərini ləyaqətlə yerinə yetirəcəklər”, – deyə o əlavə edib.
11:45 02.11.2026
Oxunuş sayı: 46
