ABŞ Rusiya qazının Ukrayna üzərindən Avropaya nəqlini bərpa etmək istəyir
ABŞ qış mövsümü ərəfəsində enerji sahəsində atəşkəsə nail olmaq məqsədilə Rusiya qazının Ukrayna ərazisindən Avropaya nəqlinin ən qısa zamanda bərpasını təklif edir.
Crossmedia.az xəbər verir ki, “The Wall Street Journal” (WSJ) qəzeti bu barədə ABŞ, Avropa və Ukrayna rəsmilərinə istinadən məlumat yayıb.
Nəşrin məlumatına görə, təşəbbüs Moskva və Kiyev arasında enerji obyektlərinə qarşı hücumların dayandırılmasını nəzərdə tutan mümkün razılaşma çərçivəsində müzakirə olunur.
ABŞ nümayəndələri hesab edirlər ki, Rusiyanın Avropa təbii qaz bazarına qayıtması Prezident Vladimir Putin üçün razılaşmanın əldə edilməsinə ciddi stimul yarada bilər.
Eyni zamanda, Ukrayna öz ərazisindən qaz tranzitinə görə əlavə gəlirlər əldə edə bilər.
Məlumata əsasən, ABŞ nümayəndələri Stiv Uitkoff və Cared Kuşner sentyabr ayında Moskva və Kiyevə səfərləri zamanı bu təşəbbüsü gündəmə gətiriblər.
Təklif Rusiya qazının amerikalı vasitəçi şirkət üzərindən Avropaya satılmasını da nəzərdə tutur.
ABŞ administrasiyasının nümayəndəsinin sözlərinə görə, Ağ Ev Rusiyanın qaz satışından əldə edəcəyi gəlirlərin üçüncü ölkədə xüsusi eskrou hesabına köçürülməsini təklif edib.
Bu mexanizmin məqsədi vəsaitlərin Rusiya tərəfindən Ukraynadakı müharibənin maliyyələşdirilməsinə yönəldilməsinin qarşısını almaqdır.
Bununla belə, təşəbbüs Avropa ölkələrinin müqaviməti ilə üzləşib. Avropa İttifaqı Rusiya qazından asılılığı azaltmaq və 2027-ci ilin sonunadək onun idxalından imtina etmək siyasətini davam etdirir.
Qeyd edək ki, Rusiya qazının Ukrayna üzərindən Avropaya nəqlinin bərpasına dair hələlik yekun razılıq əldə olunmayıb.
11:23 02.11.2026
Oxunuş sayı: 55
