Ukraynada cəbhədə vəziyyət dəyişir: Rusiya ərazi itirir
Rusiya ordusu 2026-cı ilin oktyabrında Ukraynada ələ keçirdiyindən daha çox ərazi itirib. Bu, ardıcıl ikinci aydır ki, qeydə alınır.
Crossmedia.az xəbər verir ki, ABŞ-nin Müharibənin Öyrənilməsi İnstitutu (ISW) noyabrın 1-də yayımladığı hesabatda bu barədə məlumat verib.
Analitiklərin hesablamalarına görə, Rusiya qüvvələri oktyabr ayında Ukrayna ərazisinin 139,85 kvadratkilometrinə nəzarəti ələ keçirib və ya mövqelərini möhkəmləndirib.
Eyni dövrdə Rusiya ordusu 167,14 kvadratkilometr əraziyə nəzarəti itirib. Nəticədə xalis ərazi itkisi 27,29 kvadratkilometr təşkil edib.
Bu isə gündəlik orta hesabla 0,88 kvadratkilometr ərazi itkisi deməkdir.
ISW-nin məlumatına əsasən, Rusiya qoşunları yalnız Sumı və Zaporojye vilayətlərində ərazi irəliləyişi əldə ediblər.
Donetsk vilayəti də daxil olmaqla, cəbhənin digər istiqamətlərində isə Rusiya qüvvələrinin nəzarət etdiyi ərazilər azalıb.
Hesabatda qeyd olunur ki, Rusiya hərbçilərinin tam nəzarətə götürə bilmədiyi ərazilərə sızma əməliyyatları da nəzərə alındıqda, oktyabr ayı üzrə xalis ərazi itkisi 76,38 kvadratkilometrə çatır.
Analitiklərin hesablamalarına görə, Rusiya qüvvələri ay ərzində ümumi sahəsi 5,86 kvadratkilometr olan 10 yaşayış məntəqəsini ələ keçirib. Ukrayna qüvvələri isə 3,24 kvadratkilometr ərazini əhatə edən 11 yaşayış məntəqəsini azad edib və ya oradakı Rusiya qüvvələrinin mövcudluğunu aradan qaldırıb.
Qeyd edək ki, bu rəqəmlər ISW-nin açıq mənbələr əsasında apardığı qiymətləndirmələrə əsaslanır və döyüş meydanındakı vəziyyət dəyişdikcə yenilənə bilər.
11:08 02.11.2026
Oxunuş sayı: 52
