Prezident İranla bağlı konkret danışdı - Münasibətləri pisləşdirmək istəyənlər kimlər idi?

Müharibə dövründə Azərbaycan xalqı və dövləti İran xalqı və dövlətinin yanında olub.

Azərbaycan Respublikasının Prezidenti İlham Əliyev iyunun 24-də İran İslam Şurası Məclisinin sədri Məhəmməd Baqir Qalibafın başçılıq etdiyi nümayəndə heyətini qəbul edərkən deyib ki, müharibə dövründə Azərbaycan xalqı və dövləti İran xalqı və dövlətinin yanında olub.

Prezident İlham Əliyev özünün İran İslam Respublikasının Prezidenti Məsud Pezeşkianla telefonla danışıqlarını, həmçinin müxtəlif səviyyələrdə digər təmasları və həmrəylik nümunələrini bunun əyani göstəricisi kimi qiymətləndirib.

Müharibənin dayandırılmasının Azərbaycan tərəfindən sevinc hissi ilə qarşılandığını vurğulayan dövlət başçısı bununla bağlı ölkəmiz tərəfindən dərhal rəsmi bəyanatın verildiyini xatırladıb.

“Arzu edirəm ki, bölgədə heç bir müharibə olmasın”, - deyən Prezident İlham Əliyev həm Azərbaycanın, həm də İranın vaxtilə müharibələrdən əziyyət çəkdiklərini qeyd edib.

Azərbaycanın xarici siyasət strategiyası regional sabitliyin, müstəqil qərarların və milli maraqların qorunması prinsipləri üzərində qurulmuşdur. Prezident İlham Əliyevin Məhəmməd Baqir Qalibafla görüşündə səsləndirdiyi fikirlər ölkəmizin regionda sülhün tərəfdarı olduğunu və qonşuluq münasibətlərinə verdiyi yüksək dəyəri bir daha nümayiş etdirir. Bu bəyanat sadəcə diplomatik bir jest deyil, həm də Azərbaycanın müstəqil, balanslaşdırılmış və səmimi xarici siyasət xəttinin növbəti bariz təzahürüdür.

Dövlət başçısının verdiyi mesajlarla bağlı Milli Məclisin Komitə sədri Fazil Mustafa Crossmedia.az-la fikirlərini bölüşüb: "Əslində, bu, Azərbaycanın birbaşa, açıq və səmimi mövqeyidir. Yəni bəzən görürsən ki, hətta Azərbaycana qarşı da müəyyən addımlar atılır, bir sıra ölkələr tərəfindən saxta iddialar səsləndirilir. Azərbaycan müstəqil dövlətdir. Ölkəmiz bütün qonşu dövlətlərlə, hətta bir-biri ilə münasibəti olmayan ölkələrlə belə, müəyyən dərəcədə balanslı və tərəfsiz münasibət saxlamağa üstünlük verir.

Bizim Rusiya, İsrail və İranla çox normal əlaqələrimiz var. Bəzən bizim kiminləsə qurduğumuz əlaqə başqa bir ölkənin xoşuna gəlməyə bilər. Amma biz digər dövlətlərlə münasibətlərə zərər vura biləcək bir əlaqələr sistemini heç kimlə qurmuruq. Hər bir qonşu dövlətlə ayrıca münasibətimiz mövcuddur. Eyni zamanda, onların başqaları ilə olan münaqişələrinin bizə heç bir təsiri yoxdur. Çünki bu, həmin ölkələrin öz daxili işidir. Ona görə də biz xarici siyasətdə həmişə balanslı xəttə üstünlük veririk.

Bizim ölkənin ərazisindən hər hansı bir şəkildə İrana qarşı hərbi əməliyyatların həyata keçirilməsi və ya bu cür addımların atılması heç vaxt mümkün olmayıb. Çünki Azərbaycan kifayət qədər müstəqil bir ölkədir; istənilən qüvvəyə öz mövqeyini açıq şəkildə bildirir və öz ərazisindən kiməsə qarşı istifadə olunmasına heç vaxt imkan verməz.

Ona görə də bəzən səslənən bu cür iddialar, sadəcə, ölkələr arasında münasibətlərin pozulmasına xidmət edən açıqlamalardır və bunlardan yayınmaq lazımdır. Cənab Prezident də açıq şəkildə qonşu ölkə ilə normal iqtisadi-siyasi əməkdaşlığın gücləndirilməsində maraqlı olduğumuzu dilə gətirdi. Şübhəsiz ki, İran tərəfində də ağlı başında olan insanlar bunu çox gözəl anlayırlar.

İndi bəzi təxribatçı elementlər müəyyən problemlər, xüsusilə də son dron hücumundan sonrakı gərgin vəziyyəti yaratmağa çalışsalar da, bu planları baş tutmadı. Oradakı uzaqgörən insanlar anladılar ki, problemin kökünü başqa yerdə axtarmaq lazımdır. Azərbaycanla hər hansı bir şəkildə münasibətləri pozmaq heç İranın da maraqlarına uyğun deyil. Ona görə də biz qarşılıqlı maraqlarımızı qorumaqla, əməkdaşlığımızı bundan sonra da gücləndirməliyik".

Turqut Ansari

🖨 Çap et

10:37 26.06.2026

Oxunuş sayı: 62