Ermənistanın internetini də Azərbaycan verəcək: Bəs İrəvan sülhə hazırdırmı?
İqtisadi və rəqəmsal inteqrasiyanın regional sülhün ən güclü hərəkətverici qüvvəsinə çevrildiyi müasir dövrdə, Cənubi Qafqazda tarixi bir transformasiyanın şahidi oluruq. Uzunillik siyasi gərginliklərin kölgəsindən çıxaraq real addımlarla irəliləyən Azərbaycan-Ermənistan münasibətləri, artıq sadəcə diplomatik bəyanatlarla deyil, fiber-optik kabellərin və enerji marşrutlarının dili ilə danışmağa başlayır. "AzerTelecom" və "Telecom Armenia" arasında imzalanan internet tranziti müqaviləsi, eləcə də energetika və logistika sahəsindəki ilkin əməkdaşlıqlar göstərir ki, rəqəmsal və iqtisadi asılılıq sülh müqaviləsinə gedən yolun ən etibarlı təməlidir. Bu kontekstdə, regionda formalaşan yeni reallıq iqtisadi maraqların siyasi stereotipləri necə üstələdiyini və dayanıqlı sülhün qaçılmaz mühərrikinə çevrildiyini aydın şəkildə nümayiş etdirir.
Milli Məclisin deputatı Vüqar Bayramov normallaşma əlaqalərinin növbəti təzahürü barədə Crossmedia.az-la fikirlərini bölüşüb: "Azərbaycan sülh gündəliyinə sadiq qalaraq, regionda dayanıqlı sülhün formalaşmasına öz töhfəsini verməkdədir. Nəzərə almaq lazımdır ki, Azərbaycanın yanacaq məhsulları artıq Ermənistan bazarına ixrac olunur və 2025-ci ilin sonuncu ayından etibarən hər iki ölkə arasında yanacaq idxal-ixracı üzrə əməkdaşlıq formalaşıb. Eyni zamanda, Azərbaycan üzərindən Ermənistana daşınan bütün yüklərlə bağlı qadağalar və məhdudiyyətlər aradan qaldırılıb. Sözügedən razılaşmaya Ermənistana internet tranziti də Azərbaycan üzərindən həyata keçiriləcək. Bu, təbii ki, regiondakı sülhün möhkəmlənməsinə verilən böyük bir töhfədir. Çünki bu addım əməkdaşlıqda artıq yeni bir səhifə açır. Baş verənlər, təbii ki, Cənubi Qafqazda dayanıqlı sülhün formalaşmasına Azərbaycanın verdiyi növbəti sülhməramlı dəstək kimi xarakterizə olunmalıdır.
Bir tərəfdən, Ermənistan internet də daxil olmaqla fərqli xidmətlərin idxalını diversifikasiya etməyə çalışır və bu istiqamətdə Azərbaycanla əməkdaşlığı gücləndirir ki, bu proses artıq real olaraq müşahidə olunmaqdadır. Digər tərəfdən isə bu anlaşmalar, sözsüz ki, Azərbaycanın geosiyasi mövqeyini daha da gücləndirir.
Ümumiyyətlə, son anlaşmalar bir daha sübut edir ki, Azərbaycanın formalaşdırdığı yeni düzən region ölkələri üçün böyük əməkdaşlıq perspektivləri vəd edir. Şübhəsiz ki, Ermənistan qeyri-konstruktiv siyasətinə düzəlişlər edərsə və sülh müqaviləsi daha qısa müddətdə bağlanarsa, bütövlükdə Azərbaycanın əməkdaşlıqla bağlı reallaşdırdığı fəaliyyətlər nəticəsində bölgədə iqtisadi inkişaf üçün tamamilə yeni imkanlar yaranacaq".
Turqut Ansari
10:37 25.06.2026
Oxunuş sayı: 77
