"Yüksəliş" müsabiqəsinin qalibi: İnsanın özünü sınağa çəkməsi üçün nadir fürsətdir
Artıq bir neçə ildir reallaşdırılan “Yüksəliş” layihəsi ölkədə geniş maraq doğuran və ciddi izlənən bir müsabiqəyə çevrilib. Bu layihə vasitəsilə istedadlı kadrların seçilməsi, onların bacarıq və potensialına uyğun vəzifələrə irəli çəkilməsi dövlətin gənc, peşəkar insanlara verdiyi yüksək dəyərin bariz nümunəsidir. Müsabiqənin əvvəlki illər qaliblərinin bu gün müxtəlif sahələrdə yüksək vəzifələrdə çalışması da bunun ən real təsdiqidir. “Yüksəliş” təkcə idarəetməyə yeni nəfəs gətirmir, həm də peşəkar və etibarlı kadr ehtiyatının formalaşmasına ciddi töhfə verir. Nəticə etibarilə hər il bu layihə onlarla aktiv və bacarıqlı gəncin üzə çıxmasına, onların parlamasına və inkişafı üçün yeni imkanlar qazanmasına şərait yaradır.
Crossmedia.az məsələnin aktuallığını nəzərə alaraq "Yüksəliş hekayəsi" rubrikası çərçivəsində qaliblərə silsilə müsahibələri davam etdirir. Növbəti müsahibimiz isə 4-cü "Yüksəliş" müsabiqəsi qalibi Teymur Rəhimovdur.
— Özünüz haqqında qısa məlumat verərdiniz. Harada təhsil almısınız və hazırda hansı sahədə fəaliyyət göstərirsiniz?
-Mən Rəhimov Teymur Azər oğlu, 1990-cı ildə Bakıda anadan olmuşam. Bakı Özəl Türk Liseyinin məzunuyam. Daha sonra Türkiyədə yerləşən "Fatih" Universitetində sənaye mühəndisliyi ixtisası üzrə bakalavr təhsili almışam. Magistr təhsilimi SOCAR-ın xarici təqaüd proqramı çərçivəsində Böyük Britaniyanın Warwick Universitetində “Biznes İdarəçiliyi” üzrə tamamlamışam. Karyerama SOCAR-da başlamışam. İlk olaraq sənaye proseslərinin avtomatlaşdırılması üzrə mühəndis kimi çalışmışam. Daha sonra layihə mühəndisi, ardınca isə müxtəlif layihə vəzifələrində fəaliyyət göstərmişəm. Hazırda özəl sektorda layihə meneceri vəzifəsində işləyirəm.
— "Yüksəliş" müsabiqəsinə ilk dəfə nə zaman qatıldınız və təəssüratlarınız necə oldu?
-İlk dəfə "Yüksəliş" layihəsi haqqında elan olunduqda xəbərdar oldum və dostlarımın təşviqi ilə müsabiqəyə qoşuldum. Pandemiya səbəbindən proseslər gecikdi və nəticədə müsabiqəyə real şəkildə 2021-ci ildə qatılmaq mümkün oldu. İlk cəhdimdə finala qədər irəliləsəm də, qalib ola bilmədim. Bu isə məndə məqsəd formalaşdırdı: yenidən iştirak edib qalib gəlmək. Növbəti müsabiqədə müəyyən ailə səbəblərinə görə iştirak edə bilmədim. Lakin daha sonra qatılaraq qalib oldum. "Yüksəliş" həm çox çətin, həm də çox dəyərli bir platformadır. Müxtəlif mərhələlərdən, testlərdən, müsahibələrdən keçərək özünü sınamaq imkanı yaradır. Bu müsabiqə insanın komfort zonasından çıxaraq yeni mühitdə özünü sınağa çəkməsi üçün nadir fürsətdir. Mən hər kəsə iştirak etməyi tövsiyə edirəm.
— "Yüksəliş" qaliblərinin bir çoxunun xaricdə təhsil alması bəzən üstünlük kimi qiymətləndirilir. Siz bu haqda nə düşünürsünüz?
- Düşünmürəm ki, xaricdə təhsil Yüksəliş müsabiqəsində həlledici üstünlükdür. Müsabiqənin meyarları tam obyektivdir və iştirakçının harada təhsil almasından daha çox bilik, bacarıq və potensialı nəzərə alınır. Əlbəttə, xaricdə təhsil şəxsi inkişaf üçün müsbət təsir göstərir, dünyagörüşünü genişləndirir, amma bu, qalibiyyət üçün vacib şərt deyil. Çoxlu qaliblər olub ki, xaricdə təhsil almayıblar, amma yüksək nəticə göstəriblər.
— Dövlət İmtahan Mərkəzinin hazırladığı test sualları ilə bağlı fikirləriniz necədir? Çətinlik səviyyəsini necə qiymətləndirirsiniz?
-Hazırlıq dövründə müxtəlif mənbələrdən istifadə edib özümü inkişaf etdirməyə çalışmışam. Amma sualların birbaşa eyni formatda olduğu hər hansı xüsusi mənbə yoxdur. Onlar daha unikal və spesifik hazırlanır. Mənə nə çox asan, nə də həddindən artıq çətin gəldi. Sadəcə ciddi hazırlıq tələb edir. Testləri uğurla cavablandırmaq üçün məntiq, strateji düşüncə və analitik yanaşma lazımdır.
— Gənclərə "Yüksəliş"də iştirak etməyi niyə tövsiyə edərdiniz?
- "Yüksəliş" müsabiqəsi həm mentorluq proqramı, həm də maliyyə mükafatı təqdim edir. Amma, məncə, ən böyük qazanc orada formalaşan çevrədir. Çox istedadlı və perspektivli gənclərlə tanış olursan, əlaqələr qurursan, fikir mübadiləsi aparırsan. Bu cür çevrəni başqa mühitdə qısa zamanda formalaşdırmaq çox çətindir.
— Mentorlarınız kim olub?
-Mentorlarım BP şirkətinin vitse-prezidenti Bəxtiyar Aslanbəyli və Energetika naziri Pərviz Şahbazov olub. Bu iki mentor mənə eyni sahəni iki fərqli prizmadan — həm biznes, həm dövlət idarəçiliyi perspektivindən göstərib. Bu, mənim üçün çox dəyərli təcrübə oldu.
— "Yüksəliş" müsabiqəsinin gələcək inkişafı ilə bağlı hər hansı təklifiniz varmı?
- Hesab edirəm ki, Yüksəliş ildən-ilə təkmilləşir və daha peşəkar şəkildə təşkil olunur. Məncə, bu model digər sahələrə və qurumlara da tətbiq edilə bilər. Universitetlərdə, müxtəlif dövlət strukturlarında və ya özəl sektorda da bu formatdan istifadə olunsa, ölkəmizdə daha genişmiqyaslı inkişaf mühitinin yaranmasına töhfə verər.
Ayhan
12:36 20.10.2025
Oxunuş sayı: 10347
