Çarpaz baxış,Yüksəliş hekayəsi
“Yüksəliş” qalibi: Problemi hissələrə ayırıb ən kritik nöqtələrə fokuslanmaq həmişə nəticə verir
Artıq bir neçə ildir təşkil olunan “Yüksəliş” müsabiqəsi Azərbaycanda ciddi maraq doğurur. Müsabiqənin qaliblərindən bir çoxunun bu gün yüksək vəzifələrdə çalışması da layihənin kadrların seçilməsi və idarəetmə potensialının üzə çıxarılması baxımından əhəmiyyətini göstərir. Təkcə bu fakt onu deməyə əsas verir ki, “Yüksəliş” idarəetmə prosesində mühüm rol oynamaqla yanaşı, etibarlı və bacarıqlı kadrların müəyyənləşdirilməsinə də töhfə verir.
Crossmedia.az məsələnin aktuallığını nəzərə alaraq, “Yüksəliş hekayəsi” rubrikası çərçivəsində müsabiqə qalibləri ilə silsilə müsahibələri davam etdirir.
III “Yüksəliş” müsabiqəsinin qaliblərindən biri, Təhsilin İnkişafı Fondunun Layihələrin idarə olunması şöbəsinin müdiri Rəsul Həşimovla müsahibəni təqdim edirik.
- Sizin uğur yolunuzda “Yüksəliş” müsabiqəsinin rolu nə oldu və bu proses şəxsiyyətinizdə hansı əsas dönüş nöqtələrini yaratdı?
- “Yüksəliş” mənim üçün yarışma olmaqla yanaşı, həm də özümü daha yaxından tanımaq, güclü tərəflərimi görmək və inkişaf etdirməli olduğum məqamları müəyyənləşdirmək imkanı oldu. Bu prosesin ən əsas rolu ölkə səviyyəsində potensialımı dərk etmək, müxtəlif sahələrdən olan peşəkarlarla bir ekosistemdə özümü sınamaq imkanı yaratmasıdır. Müsabiqə zamanı fərqli sahələrdən olan insanlarla qısa müddətdə komanda qurmaq, ortaq qərarlar vermək və nəticəyə nail olmaq lazım idi. Dönüş nöqtəsinə gəldikdə, müsabiqə mənə qeyri-müəyyənlik şəraitində sürətli və operativ qərarlar qəbul etmək, stressə davamlılığı artırmaq və fərqli düşüncə tərzinə sahib insanlarla ortaq məxrəcə gəlmək baxımından böyük təcrübə qazandırdı. Həmçinin komfort zonasından çıxaraq daha genişmiqyaslı idarəetmə proseslərinə strateji baxışla yanaşmağımı təmin etdi. Eyni zamanda “Yüksəliş” mənə Azərbaycan Dövlət İqtisad Universitetinin İqtisadiyyat ixtisası üzrə bakalavr, daha sonra İqtisasdiyyatın hüquqi tənzimlənməsi üzrə magistr diplomlarına yiyələnməyimə baxmayaraq, Böyük Britaniyanın York Universitetinin Dövlət idarəçiliyi üzrə ikinci magistr təhsili almağıma sövq etdi.
- Hansı bacarıq və keyfiyyətlərinizin qalib gəlməyinizdə əsas rol oynadığını düşünürsünüz?
- Qalib gəlməyimdə sistemli yanaşma, analitik düşüncə və məqsədyönlülüyün mühüm rol oynadığını düşünürəm. Layihələrin idarə olunması sahəsindəki təcrübəm mürəkkəb tapşırıqları təhlil etməyə, onları mərhələlərə bölməyə və prioritetləri müəyyənləşdirməyə kömək etdi. Bununla yanaşı, komanda üzvlərini dinləmək, fərqli fikirlərə açıq olmaq və ümumi nəticəyə fokuslanmaq da vacib idi. Çünki idarəetmədə uğurlu nəticə üçün tək bilik kifayət deyil, həmin bilikləri düzgün komanda işi ilə birləşdirmək lazımdır.
- Bu müsabiqədə iştirak edərkən qarşılaşdığınız ən çətin mərhələ hansı idi və siz bu çətinliyi hansı strategiya ilə aşdınız?
- Ən çətin mərhələlərdən biri məhdud vaxt ərzində mürəkkəb məsələləri təhlil etmək və komanda olaraq ortaq qərara gəlmək tələb olunan keys həlli mərhələləri idi. Böyük həcmli informasiyanı qısa müddətdə qiymətləndirmək və fərqli yanaşmaları uzlaşdırmaq həm diqqət, həm də çeviklik tələb edirdi. Bu çətinliyi aşmaq üçün tətbiq etdiyim əsas strategiya panikaya qapılmadan prioriteti müəyyənləşdirmək, məsuliyyəti düzgün bölüşdürmək və analitik yanaşma tətbiq etmək oldu. Burada komandanı vahid bir fikir ətrafında toplamaq və zidd fikirləri məntiqli formada uyğunlaşdırmaq bacarığı mühüm əhəmiyyət kəsb edirdi. Problemi hissələrə ayırıb ən kritik nöqtələrə fokuslanmaq həmişə nəticə verir.
- “Yüksəliş” həm də öyrənmə mühitidir. Bu mühit sizə hansı yeni bacarıqları və düşüncə tərzini qazandırdı?
- “Yüksəliş” mənə fərqli sahələrdə çalışan insanlarla birgə işləmək və məsələlərə müxtəlif baxış bucaqlarından yanaşmaq imkanı verdi. Bu təcrübə göstərdi ki, eyni problemə fərqli həll yolları ola bilər və düzgün qərar vermək üçün başqalarının fikirlərini dinləmək vacibdir. Peşəkar fəaliyyətimdə sistem və alətlərdən daha çox insan amilinə üstünlük vermişəm. Mənim üçün insanlarla düzgün ünsiyyət qurmaq, onların fikirlərini nəzərə almaq və potensiallarını üzə çıxarmaq hər zaman önəmli olub. “Yüksəliş” müsabiqəsi də bu yanaşmamı bir daha təsdiqlədi və insan amilinin uğurlu idarəetmədə nə qədər vacib olduğunu bir daha göstərdi. Mənim üçün əsas prinsiplərdən biri də budur ki, inkişaf davamlı bir prosesdir və hər yeni təcrübə insana özünü təkmilləşdirmək üçün fürsət yaradır.
- Liderlik anlayışını sizin üçün fərqləndirən əsas xüsusiyyətlər hansılardır və bu xüsusiyyətləri real həyatda necə tətbiq edirsiniz?
- Mənim üçün liderlik status və ya səlahiyyət deyil, məsuliyyət götürmək və insanları ortaq məqsəd ətrafında birləşdirə bilməkdir. Əsl lider komandasındakı potensialı üzə çıxaran, çətin anlarda önə atılan, məsuliyyəti öz üzərinə götürə bilən və şəxsi nümunəsi ilə təsir edən şəxsdir. Real həyatda və idarəetmə fəaliyyətimdə bu prinsipləri açıq ünsiyyət, şəffaflıq və komanda üzvlərinə etimad göstərməklə tətbiq edirəm. İdarəetmə mənim üçün həm də insanlara dəyər vermək və onları inkişaf etdirmək deməkdir.
- Gənclərə və gələcək iştirakçılara tövsiyə olaraq, bu müsabiqəyə hazırlaşarkən hansı bacarıqların inkişafını vacib hesab edirsiniz?
- Gələcək iştirakçılara ilk növbədə öz üzərilərində davamlı işləməyi, öz sahələri ilə yanaşı, ümumi dünyagörüşlərini və analitik bacarıqlarını genişləndirməyi tövsiyə edirəm. Xüsusilə tənqidi düşüncə, vaxtın idarə edilməsi, təqdimat bacarıqları və emosional intellekt müsabiqədə uğurun təməlini təşkil edir. Ən əsası isə özlərinə inansınlar və prosesdən zövq alsınlar, çünki əsl qazanc qazanılan təcrübə və qurulan dəyərli əlaqələrdir.
Kənan Novruzov
11:00 29.10.2026
Oxunuş sayı: 236
