Hazırlıqlı olmalıyıq: Azərbaycana qarşı anti-təbliğat kampaniyası işə düşüb- MÜSAHİBƏ
Prezident İlham Əliyevin oktyabrın 27-də "Ortaq gələcək naminə dialoq" mövzusunda VII Ümumdünya Mədəniyyətlərarası Dialoq Forumunun açılış mərasimində çıxışında Azərbaycanın müstəqil siyasəti, milli kimliyin qorunması, regional sülh və beynəlxalq münasibətlərlə bağlı mesajlar diqqət çəkib. Dövlətlərarası münasibətlərdə beynəlxalq hüququn rolu, informasiya təhlükəsizliyi və mədəniyyətlərarası dialoq da çıxışın əsas istiqamətləri sırasında yer alıb.
Milli Məclisin keçmiş deputatı Elman Məmmədov dövlət başçısının çıxışında səsləndirdiyi fikirlər barədə Crossmedia.az-ın suallarını cavablandırıb:
– Prezidentin çıxışının əsas siyasi mesajını necə qiymətləndirirsiniz?
– Cənab Prezidentin çıxışı çox uzaqgörən və düzgün istiqamətlənmiş siyasətin ifadəsidir. Mən bunu sülh, tərəfdaşlıq, əməkdaşlıq, inkişaf və təhlükəsizlik siyasəti kimi qiymətləndirirəm.
– Azərbaycanın müstəqil siyasət kursu hazırkı beynəlxalq gərginliklər fonunda hansı əhəmiyyət daşıyır?
– Cənab Prezident bəyan etdi ki, biz müstəqil və suveren dövlətik, yolumuz inkişaf, müstəqillik, demokratiya, sülh və əməkdaşlıq yoludur. Biz bütün mədəniyyətlərin və dinlərin qarşılıqlı münasibət və anlaşma şəraitində inkişafını dəstəkləyirik. Bu, təkcə özümüzü və regionumuzu deyil, bütün dünyanı sülhə, əməkdaşlığa və tərəfdaşlığa çağırmaq deməkdir.
Bu gün beynəlxalq hüququn təsir gücünün zəiflədiyi, təhlükələrin hər an mövcud olduğu bir dövrdə yaşayırıq. Buna görə də dövlətlər qarşılıqlı münasibətlərdə səmimi olmalı, tərəfdaşlıq və əməkdaşlıq prinsiplərinə əsaslanmalıdırlar. Biz dostluq və əməkdaşlıq əlimizi uzatdığımız tərəflərdən də eyni münasibəti gözləyirik. Bizə qarşı ikili standartlar tətbiq edilməməli, daxili işlərimizə müdaxilə olunmamalıdır. Tarix göstərir ki, dövlətlərin daxili işlərinə qarışmaq və ikili standartlarla davranmaq müharibələrə, qarşıdurmalara və münasibətlərin kəskinləşməsinə səbəb olur.
– Milli kimliyin qorunması məsələsinin ön plana çəkilməsi hansı çağırışlarla bağlıdır?
– Biz İslam dünyasının bir parçasıyıq, azərbaycanlıyıq və milli kimliyimizi qoruyub saxlamışıq, bundan sonra da qoruyacağıq. Eyni zamanda, dünya ilə inteqrasiya edən, demokratik inkişaf yolunu seçən dövlətik. Elm, mədəniyyət və digər sahələrdə dünyada mövcud olan mütərəqqi təcrübələrdən yararlanmağa çalışırıq.
Bununla yanaşı, milli kimliyimizə sahib çıxırıq. Biz azərbaycanlıyıq, müsəlmanıq və dinimiz İslamdır, ancaq bütün dinlərə hörmətlə yanaşırıq. Azərbaycanda müxtəlif dinlərin nümayəndələri dostluq və qardaşlıq şəraitində yaşayırlar. Cənab Prezident də bəyan etdi ki, bizim ailəmiz türk dünyasıdır. Biz türk dünyasının və İslam dünyasının bir parçasıyıq. Milli kimliyimiz bizim üçün müqəddəsdir və onu qorumaq siyasətimizi bundan sonra da davam etdirəcəyik.
– İnformasiya mühitində ideoloji təhlükələrə qarşı mübarizədə dövlət və cəmiyyətin rolu necə bölüşdürülməlidir?
– Xarici və ideoloji təsirlər həmişə olub, bu gün də var və gələcəkdə də olacaq. Buna görə cəmiyyət bu məsələlərə ciddi yanaşmalıdır. Ətrafımızda və bizdən uzaqda yerləşən bütün dövlətlərin Azərbaycana dost münasibət bəslədiyini deyə bilmərik. Bizə dost olmayan dövlətlər informasiya və ideoloji təsirlərdən məharətlə istifadə edirlər.
Xüsusilə dünyada baş verən hadisələri tam təhlil etmək imkanına malik olmayan insanlara, o cümlədən gənclərimizə zərərli təbliğat yönəldilir. Odur ki, bu sahəyə daha çox diqqət yetirməliyik. Biz daha fəal və hazırlıqlı olmalıyıq ki, xaricdən ötürülən zərərli informasiyanı neytrallaşdıra bilək. Bu, çox vacib məsələdir.
– Azərbaycanın beynəlxalq platformalarda fəallığı ölkənin siyasi nüfuzuna necə təsir göstərir?
– Son bir neçə ildə Azərbaycanda siyasi, iqtisadi, hüquqi, idman, mədəniyyət və elm sahələrini əhatə edən çoxsaylı beynəlxalq tədbirlər keçirilib. Əhalisinin və ərazisinin böyük olmamasına baxmayaraq, Azərbaycan mötəbər beynəlxalq təşkilatların tədbirlərinə və yüksək səviyyəli görüşlərə ev sahibliyi edən ölkə kimi tanınıb.
Belə tədbirlərin təşkili təhlükəsizlik, etimad və təşkilatçılıq imkanları ilə bağlıdır. Azərbaycanın bu tədbirlərə ev sahibliyi etməsi ölkəmizə etimad göstərildiyini nümayiş etdirir. Azərbaycanda keçirilən beynəlxalq səviyyəli tədbirlər ölkəmizin dünya miqyasında nüfuzunun artdığını göstərən amillərdəndir.
– Prezidentin regional sülhlə bağlı mesajları Azərbaycan-Ermənistan münasibətlərinin gələcəyi baxımından nə ifadə edir?
– Cənab Prezident bir daha bəyan etdi ki, bizə qarşı edilən ədalətsizliklərə və ikili standartlara baxmayaraq, xalqımız öz gücünü və cəsarətini nümayiş etdirərək torpaqlarını işğaldan azad edib. Azərbaycan qələbə qazandıqdan sonra erməni xalqından intiqam almaq yolunu seçmədi. Biz cinayətkarlara və müharibə canilərinə qarşı tədbirlər gördük, daha sonra isə sülh quruculuğuna başladıq.
Ermənistanın uzun illər ərzində Azərbaycan ərazilərini viran qoymasına, müqəddəs yerlərimizi dağıtmasına və xalqımıza qarşı törədilmiş cinayətlərə baxmayaraq, Azərbaycan sülh çağırışını davam etdirdi. Bu gün ölkəmiz Cənubi Qafqazda sülhün təmin olunması istiqamətində fəaliyyət göstərir. Məqsədimiz sülhün dayanıqlı olması, yeni müharibələrin baş verməməsi, xalqların və dövlətlərin mehriban əməkdaşlıq şəraitində yaşamasıdır. Müharibə inkişaf yolu deyil. Hesab edirəm ki, cənab Prezident bu istiqamətdə qətiyyətlidir və biz bu siyasəti davam etdirəcəyik.
– Beynəlxalq hüququn prinsipləri ilə dövlətlərin real siyasi maraqları arasında ziddiyyət yarananda Azərbaycan hansı diplomatik imkanlardan istifadə edə bilər?
– Cənab Prezidentin də dəfələrlə qeyd etdiyi kimi, bu gün beynəlxalq hüququn təsir gücü zəifləyib. Dünyada sanki “güclüyəmsə, haqlıyam” yanaşması önə çıxır. Bu fəlsəfə bəşəriyyəti fəlakətə aparır. Dövlətlərarası münasibətlərdə və milli məsələlərdə beynəlxalq hüquqa, qanunlara əsaslanmaq lazımdır. Dünya güclə deyil, qanunlarla idarə olunmalıdır.
Cənab Prezident bu forumda da BMT-nin Nizamnaməsinə və Təhlükəsizlik Şurasının tərkibinə yenidən baxılmasının vacibliyini vurğulayıb. Qəbul edilən qərar və qətnamələrin icrasını təmin edən mexanizmlər gücləndirilməlidir. Azərbaycan öz təcrübəsində bunun əksini görüb: 1993-cü ildə torpaqlarımızın işğaldan azad olunması ilə bağlı dörd qətnamə qəbul edilmişdi, lakin 27 il ərzində onların heç biri icra olunmadı.
Belə bir qurumun qərarları icra edilmədikdə onun beynəlxalq münaqişələrə təsir imkanları da sual altında qalır. Dünya dövlətləri və liderləri beynəlxalq münasibətlərin gücə deyil, hüquqa əsaslanması üçün fəal mövqe ortaya qoymalıdırlar.
– Mədəniyyətlərarası dialoqun təşviqi beynəlxalq münaqişələrin qarşısının alınmasında nə dərəcədə təsirli ola bilər?
– Mədəniyyətlərarası münasibətlər sülhün və əməkdaşlığın xeyrinədir. Dünyada yaşayan xalqlar bir-birini mədəniyyət və elm vasitəsilə nə qədər yaxından tanısalar, qarşılıqlı anlaşma üçün bir o qədər geniş imkan yaranar. İnsanlar bir-birinin tarixini, köklərini və dəyərlərini öyrənərək bir-birini daha yaxşı anlaya və qəbul edə bilərlər.
Dinlərarası münasibətlərdə də qarşılıqlı hörmət vacibdir. İslam dini yarandığı gündən digər dinləri, müqəddəs kitabları və peyğəmbərləri inkar etməyib. Mən bunu İslam dininin böyüklüyü və müdrikliyi kimi qiymətləndirirəm. İslam dini müqəddəsdir və onu cəhalətlə eyniləşdirmək olmaz. Biz öz dinimizi müqəddəs bilirik, digər dinlərə də hörmətlə yanaşırıq. Bu yanaşma sülhün və qarşılıqlı anlaşmanın möhkəmlənməsinə xidmət edir.
– Xarici informasiya təsirlərinə qarşı cəmiyyətin dayanıqlığını artırmaq üçün hansı addımlar atılmalıdır?
– Xarici və ideoloji təsirlər daim mövcud olub. Bəzi dövlətlər bu təsirlərdən öz siyasi məqsədləri üçün istifadə edirlər. Xüsusilə dünyada baş verən hadisələri təhlil etməkdə çətinlik çəkən insanlara və gənclərə zərərli təbliğat yönəldilə bilər. Buna görə cəmiyyətin informasiya təsirlərinə qarşı hazırlığını artırmaq lazımdır. Biz bu sahədə daha fəal işləməli, baş verən hadisələri təhlil etmək bacarığını gücləndirməli və xaricdən ötürülən zərərli informasiyanın təsirini azaltmalıyıq. Bu istiqamətdə dövlətin və cəmiyyətin diqqətli və hazırlıqlı olması mühüm əhəmiyyət daşıyır.
– Sizcə, çıxışda səsləndirilən mesajların yaxın dövrdə Azərbaycanın daxili və xarici siyasətində hansı istiqamətlər üzrə praktik əksini görəcəyik?
– Cənab Prezident fəaliyyətinin ilk dövründən indiyədək səsləndirdiyi fikirlərin həyata keçirilməsi istiqamətində addımlar atıb. Bu gün verdiyi mesajlar da həm daxili, həm də xarici siyasət istiqamətində reallaşdırılır və bundan sonra da həyata keçiriləcək. Uğur qazanmaq üçün səsləndirilən fikirlərə uyğun fəaliyyət göstərməliyik. Yolumuz budur.
Zeynəb Həsən
10:30 29.10.2026
Oxunuş sayı: 171
