Türkiyə təzyiq dilinə keçib: Rusiya və Ukrayna razılığa gələ bilər
Qara dənizdə kommersiya gəmilərinin təhlükəsizliyi ilə bağlı Rusiya və Ukrayna arasında yeni təşəbbüs gündəmə gəlib. Ukrayna tərəfi Türkiyənin vasitəçiliyi ilə Moskvaya kommersiya gəmilərinə qarşı hücumların qarşılıqlı dayandırılmasını təklif etdiyini açıqlayıb. Kiyevin məlumatına görə, iyul ayından etibarən Qara dənizdə 218-dən çox gəmi hücuma məruz qalıb və bu vəziyyət Ukraynanın dəniz yolu ilə ixracına ciddi təsir göstərib. Rusiya isə belə bir təşəbbüsün rəsmi şəkildə ona təqdim edilmədiyini bildirir.
Politoloq Əhəd Məmmədli Crossmedia.az-a Rusiya-Ukrayna müharibəsi fonunda danışıqlar prosesinə mümkün təsirlərdən danışıb. O, yeni mövzuların danışıqların canlanmasına müəyyən təsir göstərə biləcəyini, lakin bunun hərbi müstəvidə ciddi nəticə yaradacağını düşünmədiyini bildirib:
"İndi danışıqlar onsuz da davam edir. Bu da növbəti mövzudur. Əlbəttə, hər bir mövzu danışıqların canlanmasına gətirib çıxara bilər. Amma hərbi müstəvidə bunun danışıqlara hansısa ciddi təsir edəcəyini düşünmürəm. Sadəcə, digər xarici ölkələrin təsiri ilə kommersiya müstəvisində müəyyən razılaşmalar əldə oluna bilər”.
O, bildirib ki, Rusiya ilə Ukrayna hansısa razılığa gələ bilər: “Türkiyə ona görə Qara dənizdə, yəni boğazlarda, Dardaneldə gəmilərin, əsasən də Rusiya gəmilərinin və digərlərinin hərəkətini məhdudlaşdırıb. Bu təzyiq vasitəsilə Rusiya ilə Ukrayna hansısa razılığa gələ bilərlər. Amma hərbi müstəvidə bunun danışıqlara ciddi şəkildə təkan verə biləcəyini düşünmürəm".
Nigar Xəlilli
15:30 14.08.2026
Oxunuş sayı: 53
