Kobaxidzedən Rusiya ilə bağlı ikibaşlı açıqlama: İşğal edib, amma düşmən deyil?
Gürcüstanda Rusiyanın ölkə üçün düşmən hesab edilib-edilməməsi ilə bağlı siyasi müzakirələr yenidən gündəmə gəlib. Gürcüstanın Baş naziri İrakli Kobaxidze bu məsələyə münasibət bildirərkən Rusiyanın Gürcüstan ərazilərini işğal edən yeganə dövlət olduğunu vurğulayıb.
Kobaxidzenin sözlərinə görə, Gürcüstan ərazilərinin 20 faizi Rusiya tərəfindən işğal olunub və bu, ölkəyə və xalqına qarşı açıq-aşkar cinayətdir. Baş nazir eyni zamanda Rusiyanın “düşmən” elan edilməsinin yalnız siyasi ifadə kimi qalmayacağını, sonradan konkret addımlar tələb edəcəyini bildirib.
Beynəlxalq Münasibətlərin Təhlili və Multikulturalizm Mərkəzinin (BMTMM) aparıcı məsləhətçisi Nəsibə Mirzəyeva Crossmedia.az-a açıqlamasında bildirib ki, Gürcüstanın hazırkı hakimiyyətinin Rusiya ilə bağlı xarici siyasəti Cənubi Qafqazın mürəkkəb geosiyasi mənzərəsində mühüm məsələlərdən biridir:
“Gürcüstanın hazırkı hakimiyyətinin Rusiya ilə bağlı yürütdüyü xarici siyasət Cənubi Qafqazın geosiyasi mənzərəsində ən çox müzakirə olunan mürəkkəb mövzulardan biridir. Bu mövqeyi bütöv bir şəkildə dəyərləndirmək üçün rəsmi Tbilisinin irəli sürdüyü arqumentlərə nəzər salmaq lazımdır. Baş nazir İrakli Kobaxidzenin son bəyanatı Tbilisinin Moskva ilə münasibətlərdə yürütdüyü xarici siyasət xəttinin mahiyyətini açıq şəkildə göstərir”.
N.Mirzəyeva qeyd edib ki, Tbilisinin Moskva ilə münasibətlərində əsas məsələlərdən biri işğal olunmuş ərazilərlə bağlı mövqeyidir:
“Bəyanatda deyilir ki, Rusiya Federasiyası tərəfindən işğal olunmuş ərazilərin tanınması faktı qaldığı müddətcə diplomatik münasibətlər bərpa oluna bilməz. Gürcüstanın Rusiya ilə bağlı məqsədi münaqişənin dinc yolla tənzimlənməsidir. Ümid edirik ki, siyasi dəyişikliklərin ardınca bütün bunlar mümkün olacaq. Əlbəttə ki, münaqişənin dinc yolla həlli xarici siyasət prioritetlərimizdən biridir”.
Ekspert vurğulayıb ki, Gürcüstanın siyasəti hüquqi-prinsipial mövqe, strateji təmkin və daxili siyasi mübarizənin kəsişməsində formalaşır:
“Qeyd etməliyik ki, bu siyasət bir tərəfdən hüquqi-prinsipial mövqeyin qorunması, digər tərəfdən strateji təmkin və daxili siyasi mübarizənin kəsişməsində formalaşıb. İ.Kobaxidzenin vurğuladığı “Rusiya Federasiyası Gürcüstan ərazilərinin 20%-ni işğal edən yeganə dövlətdir” tezisi rəsmi Tbilisinin xarici siyasətinin dəyişməz hüquqi özəyini təşkil edir”.
N.Mirzəyeva bildirib ki, Tbilisinin Moskva ilə iqtisadi əlaqələrə və dialoqa meyil etməsi ərazi bütövlüyü prinsipindən geri çəkilmək anlamına gəlmir:
“Digər tərəfdən bu mövqe onu göstərir ki, rəsmi Moskva ilə dialoqa və iqtisadi əlaqələrə meyl etməsi Tbilisinin ərazi bütövlüyü prinsipindən geri çəkilməsi demək deyildir. Belə çıxır ki, işğal olunmuş regionların “tanınması” faktı aradan qaldırılmadığı müddətcə diplomatik münasibətlərin bərpa olunmayacağı şərti Tbilisinin əsas “qırmızı xətti” olaraq qalacaqdır”.
BMTMM-in aparıcı məsləhətçisi Gürcüstan hökumətinin kəskin siyasi ritorikadan çəkinməsini strateji risklərin idarə olunması ilə əlaqələndirib:
“Baş nazirin Şindisidə jurnalistlərlə polemikada “Rusiyanı düşmən adlandırmaq konkret siyasi bəyanatdır və arxasında müvafiq addımlar tələb edir” şəklində yanaşması hökumətin strateji risk idarəçiliyini əks etdirir. Belə ki, kəskin siyasi ritorika ölkəni yenidən hərbi eskalasiyaya məruz qoya bilər. Bu məsələ fakt olaraq hökumət üzvlərinin ritorikasında əksini tapıb”.
N.Mirzəyeva Rusiya ilə münasibətlər məsələsinin Gürcüstanın daxili siyasi mübarizəsində də istifadə olunduğunu qeyd edib:
“Baş nazir İ.Kobaxidzenin çıxışında diqqətçəkən digər bir məqam Rusiya ilə münasibətlər mövzusunun daxili siyasi mübarizəyə də inteqrasiya olunmasıdır. Bu baxımdan hökumət rəhbərinin müxalif telekanalları “ikili standartlar yürütmək”də ittiham etməsi və onları bu kimi əməllərdən çəkinməyə çağırması daxili qütbləşmənin də aradan qaldırılmasına bir cəhd kimi qiymətləndirilə bilər”.
Ekspert hesab edir ki, Gürcüstanın Rusiya siyasəti əsasən praqmatizm və risklərin minimallaşdırılması üzərində qurulub:
“Sadaladığımız faktlar göstərir ki, Gürcüstanın Rusiya siyasəti praqmatizm və risklərin minimallaşdırılması üzərində qurulub. İşğal faktı və dövlətin suverenliyinin pozulması beynəlxalq müstəvidə bəyan edilməklə yanaşı Moskva ilə birbaşa qarşıdurmaya girməmək üçün ehtiyatlı dildən istifadə olunur. Bu balansın nə qədər müddətdə qorunub saxlanıla biləcəyi isə regiondakı geosiyasi dinamikadan, həmçinin Gürcüstanın daxili-siyasi sabitliyindən asılı olacaq”.
Nigar Xəlilli
13:30 12.08.2026
Oxunuş sayı: 40
