Xaqani Şirvaninin 900 illiyi Şuşada elmi konfransla qeyd edilib
Vaqif Poeziya Günləri çərçivəsində iyulun 17-də Şuşadakı Mehmandarovların malikanə kompleksində böyük Azərbaycan şairi Xaqani Şirvaninin 900 illik yubileyinə həsr olunmuş “Sözün Xaqanı – Xəlqaniyəm, Xəlqani” mövzusunda elmi konfrans təşkil edilib.
Crossmedia.az xəbər verir ki, tədbir Azərbaycan Milli Elmlər Akademiyası (AMEA) və Azərbaycan Yazıçılar Birliyinin (AYB) birgə təşkilatçılığı ilə keçirilib.
Konfransın açılışında çıxış edən yazıçı-dramaturq, AYB-nin katibi İlqar Fəhmi bildirib ki, Qarabağın işğaldan azad edilməsindən sonra Vaqif Poeziya Günləri yenidən öz doğma məkanında keçirilir. Onun sözlərinə görə, builki proqram müxtəlif mövzuları əhatə edən zəngin tədbirlərlə yadda qalır və yubileyləri qeyd olunan görkəmli söz və sənət adamlarının xatirəsinə həsr edilən silsilə tədbirləri əhatə edir.
Konfrans zamanı AMEA-nın alimləri Xaqani Şirvaninin zəngin ədəbi irsi, yaradıcılığı və Şərq poeziyasına bəxş etdiyi qiymətli əsərlər haqqında məruzələrlə çıxış ediblər. Tədbirdə dahi şairin Azərbaycan və dünya ədəbiyyatındakı yeri, eləcə də irsinin gələcək nəsillərə çatdırılmasının əhəmiyyəti vurğulanıb.
15:36 17.07.2026
Oxunuş sayı: 44
