Gündəm

Sosial şəbəkələr insan alveri şəbəkələrinin fəaliyyətini genişləndirib

Azərbaycanda insan alverinə qarşı mübarizənin daha sistemli və effektiv təşkili istiqamətində yeni mərhələ başlayıb. Prezident İlham Əliyevin imzaladığı sərəncamla 2026–2030-cu illər üçün İnsan Alverinə Qarşı Mübarizəyə dair Milli Fəaliyyət Planı təsdiqlənib. Sənəd insan alveri ilə mübarizə sahəsində normativ hüquqi bazanın və institusional mexanizmlərin təkmilləşdirilməsini, dövlət qurumları arasında koordinasiyanın gücləndirilməsini, eləcə də Azərbaycanın bu sahədə beynəlxalq öhdəliklərinin icrasını nəzərdə tutur. Yeni fəaliyyət planı fonunda ölkədə insan alverinə qarşı mübarizənin mövcud vəziyyəti və qarşıdakı dövrdə gözlənilən nəticələr yenidən diqqət mərkəzinə gəlib.

Mövzu ilə bağlı Crossmedia.az-a açıqlama verən Milli Məclisin deputatı Aydın Mirzəzadə qeyd edib ki, insan alveri müasir dövrün ən ciddi transmilli cinayətlərindən və qlobal təhlükələrindən biridir: “Düzdür, Azərbaycanda bu cinayət növü nisbətən aşağı səviyyədədir. Bununla belə, insan alverinə qarşı mübarizə dövlətin prioritet istiqamətlərindən biri olaraq qalır. Təsadüfi deyil ki, hər il yaz sessiyası çərçivəsində Milli Məclisdə insan alverinə qarşı mübarizə üzrə Milli Koordinatorun – daxili işlər nazirinin birinci müavininin illik hesabatı dinlənilir və parlamentdə geniş müzakirə olunur. Bu gün sosial şəbəkələrin həyatımıza sürətlə daxil olması və informasiya texnologiyalarının geniş yayılması təəssüf ki, insan alveri ilə məşğul olan cinayətkar qrupların fəaliyyət imkanlarını da artırır. Onlar xüsusilə gənclərə və qadınlara xaricdə yüksək maaşlı iş, yaxşı yaşayış şəraiti və müxtəlif cəlbedici vədlər təqdim edirlər. Gənclər isə bəzən məlumatsızlıqdan, bəzən də bu vədlərə inanaraq onların toruna düşürlər. Belə hallara rast gəlinir və bu istiqamətdə ciddi mübarizə aparılır”.

Deputat qeyd edib ki, həm beynəlxalq hüququn, həm də milli qanunvericiliyin verdiyi bütün imkanlardan istifadə olunur: “Maarifləndirmə tədbirləri həyata keçirilir, insan alveri ilə məşğul olan şəxslər barəsində çıxarılan məhkəmə qərarları ictimaiyyətə çatdırılır. Eyni zamanda bu təhlükə ilə mübarizədə qeyri-hökumət təşkilatlarının maarifləndirmə və təbliğat imkanlarından da geniş istifadə edilir. Növbəti illər üçün Milli Fəaliyyət Planının təsdiqlənməsi də onu göstərir ki, Azərbaycan insan alverinə qarşı mübarizəni bundan sonra da dövlət siyasətinin əsas istiqamətlərindən biri kimi davam etdirəcək”.

Ayhan

🖨 Çap et

18:30 16.07.2026

Oxunuş sayı: 68