Araşdırma: Qəhvə qaraciyər xəstəlikləri riskini azalda bilər
Yeni araşdırmaya görə, qəhvə – o cümlədən kofeinsiz qəhvə – içmək qaraciyər sirrozu, qaraciyər xərçəngi və qaraciyər xəstəliklərindən ölüm riskinin azalması ilə əlaqəli ola bilər.
Crossmedia.az xəbər verir ki, tədqiqat çərçivəsində Böyük Britaniyanın 350 mindən çox sakini 13 il ərzində izlənilib. Gündə 5 və ya daha çox fincan qəhvə içən şəxslərdə sirroz riski 32%, qaraciyər xərçəngi riski 47%, qaraciyər xəstəliklərindən ölüm riski isə 42% daha aşağı olub. Ən güclü müsbət nəticə gündə 3–4 fincan qəhvə içənlərdə müşahidə edilib.
Alimlər bildirirlər ki, qəhvə içənlərin qaraciyərində yağlanma, iltihab və çapıqlaşma daha az qeydə alınıb. Bununla belə, tədqiqat müəllifləri vurğulayırlar ki, yalnız bu nəticələrə əsaslanaraq qaraciyəri qorumaq məqsədilə qəhvə içməyə başlamaq tövsiyə edilmir. Onların sözlərinə görə, qaraciyər sağlamlığını qorumağın əsas yolları sağlam çəki saxlamaq, alkoqol qəbulunu məhdudlaşdırmaq, fiziki aktiv olmaq və qan şəkəri, təzyiq və xolesterini nəzarətdə saxlamaqdır.
00:30 16.07.2026
Oxunuş sayı: 63
