Euronews: Fon der Lyayen İlham Əliyevlə sülh və enerji məsələlərini müzakirə edib
Avropa Komissiyasının Prezidenti Ursula fon der Lyayenin Cənubi Qafqaza səfəri çərçivəsində Bakıda Azərbaycan Prezidenti İlham Əliyevlə görüşü mühüm əhəmiyyət kəsb edir.
Crossmedia.az xəbər verir ki, bu barədə Euronews məlumat yayıb.
Məlumata görə, görüşdə Ermənistan-Azərbaycan sülh prosesi, enerji əməkdaşlığı, nəqliyyat əlaqələri və Avropa İttifaqı ilə Azərbaycan arasında strateji tərəfdaşlığın inkişafı müzakirə olunub.
Fon der Lyayen Azərbaycanın Avropa İttifaqının etibarlı enerji tərəfdaşı olduğunu vurğulayaraq, Cənub Qaz Dəhlizinin Avropanın enerji təhlükəsizliyinin möhkəmləndirilməsində mühüm rol oynadığını bildirib. O, həmçinin Ermənistan və Azərbaycan arasında əldə olunan sülh razılaşmasını tarixi addım adlandıraraq, bunun regionda əməkdaşlıq üçün yeni imkanlar yaradacağını qeyd edib.
Avropa Komissiyasının Prezidenti bildirib ki, Brüssel nəqliyyat, enerji və rəqəmsal infrastruktur sahələrini əhatə edən Aİ–Azərbaycan Bağlantı Tərəfdaşlığı təşəbbüsünü irəli sürəcək. Onun sözlərinə görə, Global Gateway proqramı çərçivəsində Cənubi Qafqaz layihələri üçün 200 milyon avroya qədər qrant ayrılması və 2 milyard avroyadək dövlət və özəl investisiyanın səfərbər olunması nəzərdə tutulur.
İlham Əliyev isə Avropa Komissiyası ilə Azərbaycan arasında münasibətlərin misli görünməmiş fəal inkişaf mərhələsinə qədəm qoyduğunu bildirib. Prezident qeyd edib ki, hazırda Azərbaycanın qaz ixracının yarısı Avropa İttifaqına üzv ölkələrin payına düşür və Cənub Qaz Dəhlizi Azərbaycanın Avropaya təbii qaz nəqlində əsas marşruta çevrilib.
Fatimə Məmmədova
08:26 02.07.2026
Oxunuş sayı: 49
