Ofis proqramları çöküb!
"Office 365" istifadəçiləri gözlənilməz bir problemlə üzləşiblər. Belə ki, "Word", "Excel" və "Outlook" kimi proqramlarda lisenziyanın deaktiv olduğu barədə xəbərdarlıq mesajı göstərilir. "Microsoft" isə problemdən xəbərdardır və həll üçün işlərə başlayıb.
"Microsoft"a görə, bu problemin arxasında "Office" idarəçilərinin həyata keçirdiyi lisenziya dəyişiklikləri dayanır. İstifadəçilərin fərqli lisenziya qruplarına keçid edilməsi, məhsul təyinatında aparılan dəyişikliklər və ya lisenziya və xidmət planlarının aktivləşdirilib deaktivləşdirilməsi kimi əməliyyatlar bu vəziyyəti yaradır.
Şirkət, həmçinin "Masaüstü Tətbiqlərinin Ən Son Versiyası" xidmət planının deaktiv edilməsinin də bu problemi tətikləyə biləcəyini açıqlayıb. Problemlə üzləşən istifadəçilər ekranlarında belə bir xəbərdarlıq görürlər: "Microsoft 365" lisenziyalarının qısa müddətdə deaktiv ediləcəyi və idarəçilər lisenziyanı yenidən aktivləşdirənə qədər proqramların istifadə edilə bilməyəcəyi bildirilir.
"Microsoft" bu problemi aradan qaldırmaq üçün bəzi müvəqqəti həllər təklif edib. İlk olaraq, istifadəçilər xəbərdarlıq ekranında göstərilən "Yenidən Aktivləşdir" düyməsinə klikləməklə lisenziyanı yenidən aktivləşdirə bilərlər. Bu proses istifadəçilərin hesablarına daxil olub lisenziyanı yenidən təsdiqləmələrini tələb edir.
"Office" tətbiqlərindəki lisenziya problemləri üçün digər bir seçim isə bütün "Microsoft 365" proqramlarından çıxış edib, proqramları bağlayıb yenidən giriş etməyi yoxlamaqdır. Bu metodlar işləməzsə, istifadəçilər "Microsoft" ilə əlaqə saxlaya bilərlər.
"Microsoft"un mühəndislik komandası lisenziya problemini həll etmək üçün çalışır. Şirkət, problem haqqında daha ətraflı məlumatın yaxın günlərdə paylaşılacağını bildirib.
Emil Nağızadə
15:05 20.12.2024
Oxunuş sayı: 11587
