"Samsung"-dan önəmli qərar
"Samsung"un dəfələrlə təxirə saldığı "One UI 7" interfeysi üçün gözləmə sona yaxınlaşır. Cənubi Koreya istehsalçısı 5 dekabrda "Galaxy S24" seriyasına yönəlik başladığı testlər çərçivəsində yeni bir addım atdı. Son xəbərlər şirkətin "One UI 7"-nin ikinci beta mərhələsinə keçdiyini göstərir.
"Galaxy S24" modelləri üçün ikinci "One UI 7" beta yeniləməsi yayımlandı
Sənaye dairələrində etibarlı məlumat mənbəyi olan "SamMobile", "Samsung"-un "Galaxy S24" modelləri üçün "One UI 7"-nin ikinci beta versiyasını istifadəyə verdiyini açıqlayıb. Bu yeniləmə, 5 dekabrda təqdim edilən ilkin versiyada aşkar edilən problemləri aradan qaldırmaq və istifadəçi təcrübəsini yaxşılaşdırmaq məqsədi daşıyır.
Hazırda yeniləmə ABŞ və Cənubi Koreyadakı "Galaxy S24" modelləri üçün əlçatandır. Əgər hər hansı bir texniki problem baş verməzsə, yeniləmənin yaxın saatlarda Almaniya və Böyük Britaniyada da təqdim ediləcəyi gözlənilir.
Mənbənin məlumatına görə, ikinci beta yeniləməsi ilk mərhələdə iştirak edən ölkələrdə 1 GB həcmində olacaq. Bununla yanaşı, Hindistan kimi testlərə yeni daxil olan bölgələrdə yeniləmənin daha böyük həcmdə olacağı qeyd edilir. "Galaxy S23" seriyası üçün testlərin tezliklə başlayacağı gözlənilir. Tam dəqiq olmasa da, iki-üç həftə ərzində bu mövzuda yeni inkişafların olacağı bildirilir.
Bununla yanaşı, sabit versiya üçün gözlənti davam edir. Şirkət, dəqiq tarix açıqlamasa da, sabit yeniləmənin 22 yanvarda təqdim olunacaq "Galaxy S25" seriyası ilə birlikdə yayımlanacağını bildirib.
Emil Bağızadə
11:03 17.12.2024
Oxunuş sayı: 4481
