“Azərbaycan Dəmir Yolları” QSC-nin növbəti uğuru
“Azərbaycan Dəmir Yolları” QSC (ADY) beynəlxalq ISO 9001:2015 keyfiyyəti idarəetmə sistemi standartına uyğunluğunu təsdiq edən beynəlxalq sertifikatı qazanıb.
Crossmedia.az xəbər verir ki, sertifikat ADY-nin fəaliyyətinin ISO 9001 standartının tələblərinə uyğunluğunu qiymətləndirmək üçün aparılmış auditin nəticələri əsasında “TÜV Austria GMBH” sertifikatlaşdırma təşkilatı tərəfindən təqdim edilib.
ISO standartları dünyada ən geniş yayılmış önəmli standartlardandır. ADY ISO 9001 sertifikatını almaqla qlobal səviyyədə yük və sərnişin daşımaları xidmətlərini təkmilləşdirmək istiqamətində çalışdığını bir daha təsdiq edir.
ISO 9001 sertifikatı Azərbaycan Dəmir Yollarının rəqabətqabiliyyətini daha da artıraraq müştəriləri və tərəfdaşları ilə daha sıx əlaqələr qurmasını təmin edir. Eyni zamanda, şirkətin strateji inkişafını daha da möhkəmləndirir, xidmət və məhsul keyfiyyətini yüksəltməklə müştəri məmnuniyyətini artırır.
ISO 9001 standartının tələbləri əsasında daxili proseslərin daha da optimallaşdırılması və səmərəliliyin artırılması nəticəsində daha effektiv müştəri yönümlü həllər təklif ediləcək. Müştəri məmnuniyyətini daha yüksək səviyyədə təmin edən şirkət üçün yeni biznes imkanları yaranacaq.
ISO 9001 sertifikatı ADY-nin keyfiyyətli xidmət öhdəliyini və müasir idarəetmə yanaşmalarının tətbiq olunmasını daha geniş nümayiş etdirəcək, xidmətlərdə çeviklik və dəqiqlik səviyyələri yüksələcək.
17:58 14.12.2024
Oxunuş sayı: 20587
