"WhatsApp"ın yeni funksiyası işə yarayır?
"WhatsApp" istifadəçilərə məzmun paylaşımını daha da asanlaşdırmaq üçün yeni çoxfunksiyalı paylaşım çubuğu xüsusiyyətini təqdim edir. "Android" üçün "WhatsApp"ın 2.24.25.20 beta versiyasında aşkar edilən bu yenilik, məzmun paylaşımını daha sürətli və rahat bir prosesə çevirir.
"WhatsApp" tətbiqində ekranın alt hissəsinə yerləşdirilən yeni paylaşım çubuğu, məzmunun birbaşa "İnstagram", "Facebook", "X" və "Snapchat" kimi platformalara rahat şəkildə yüklənməsinə imkan verir. Bu yenilik sayəsində istifadəçilər artıq məzmunu bir platformadan yükləyib digərində paylaşmaq kimi vaxt alan prosedurdan qurtulacaqlar.
Bununla yanaşı, "WhatsApp" kanalları üçün xüsusi paylaşım seçimi də mövcuddur. Kanal yeniləməsi paylaşılmaq istənildikdə avtomatik olaraq unikal bir link yaradılır və bu link digər sosial media platformalarında da asanlıqla paylaşıla bilər.
Paylaşım çubuğunda, müəyyən tətbiqlərdən əlavə, digər platformalara çıxış üçün “Daha çox” seçimi də mövcuddur. Bu da istifadəçilərin məzmunlarını daha çox tətbiqdə paylaşmasına imkan tanıyır.
Paylaşım çubuğu ilə yanaşı digər yeniliklər də gəlir:
QR Kod ilə kanal paylaşımı:
Həm "Android", həm də "iOS" istifadəçiləri üçün kanalların QR kod vasitəsilə paylaşılması hazırda test mərhələsindədir.
Səsli mesajların mətnə çevrilməsi:
Səsli mesajların avtomatik olaraq mətnə çevrilməsi funksiyası hələ inkişaf mərhələsindədir.
Köhnə "iOS" cihazlar üçün dəstəyin dayandırılması:
2025-ci ilin may ayından etibarən "WhatsApp" yalnız iOS 15.1 və daha yeni versiyaları dəstəkləyəcək. Köhnə versiyalara sahib cihazlar artıq yeniliklərdən faydalana bilməyəcək.
Kimlər daha tez istifadə edə biləcək?
"Android" istifadəçiləri bu yeniliklərə daha tez çıxış əldə edəcəklər. "iOS" istifadəçiləri üçün isə yeniliklərin çıxış tarixi hələlik açıqlanmayıb.
"WhatsApp"ın bu yeni funksiyası sosial media məzmunlarının daha sürətli və rahat şəkildə paylaşılmasını təmin edərək istifadəçilərə böyük üstünlüklər təqdim edir.
Sevinc Abuşova
05:51 07.12.2024
Oxunuş sayı: 12547
