Heyvanlarınruhu ilə insanların ruhu arasında nə fərq var? - Dinşünas açıqladı
Ev heyvanlarının ölümdən sonra taleyi ilə bağlı müzakirələr zaman-zaman gündəmə gəlir. Bu məsələ ilə bağlı yayılan açıqlamada bildirilib ki, pişiklər və digər ev heyvanları cənnətə getmir, çünki onların ölməz ruhunun olmadığı qeyd olunur.
Məlumata görə, heyvanlar təbiətin müvəqqəti bir hissəsi hesab edilir və ölümündən sonra onların mövcudluğu davam etmir. Bununla belə vurğulanır ki, ev heyvanları sağ olduqları müddətdə sevgi və qayğı ilə əhatə olunmalıdır.
Məsələ ilə bağlı dinşünas - alim Ağa Hacıbəyli Crossmedia.az-la öz fikirlərini bölüşüb:
"Pişiklər və digər ev heyvanlarının cənnətə daxil olub-olmaması məsələsi dini mənbələrdə müəyyən şəkildə izah olunur. Əvvəlcə onu vurğulamaq lazımdır ki, təbiətdə və kainatda mövcud olan bütün canlıların ruhu vardır. Allah-Təala yaratdığı hər bir canlıya müəyyən mənada ruh vermişdir. İstər pişik, istər it, istər vəhşi heyvanlar, istərsə də digər canlılar – canı olan hər bir varlığın ruhu vardır.
Lakin heyvanların ruhu ilə insanın ruhu arasında mühüm fərq mövcuddur. İnsanlar məsuliyyət daşıyan varlıqlardır və onlar etdikləri əməllərə görə cavabdehdirlər. Buna görə də axirət həyatı – yəni cənnət və cəhənnəm – əsasən insanlara aid olan bir həyatdır. Heyvanlar isə dini baxımdan məsuliyyət daşıyan varlıqlar sayılmırlar və onlar daha çox bu dünyanın bir parçası, bir zinəti kimi yaradılmışdır".
Onun sözlərinə görə, İslam mənbələrində qeyd olunur ki, qiyamət günü Allah-Təala necə ki, insanları yenidən dirildərək bir yerə toplayacaq, eyni şəkildə heyvanları da dirildəcək: "Bu, onların arasında baş vermiş haqsızlıqların və ədalət məsələlərinin həll olunması üçün olacaq. Bundan sonra isə heyvanlar torpağa çevriləcək və onların varlığı sona çatacaq. İnsanlar isə əksinə, hesab və sorğu-sualdan keçəcəklər. Onların əməlləri ölçüləcək, mizan qurulacaq və nəticədə ya cənnətə, ya da cəhənnəmə daxil ediləcəklər. Bununla yanaşı, Qurani-Kərimdə Qurani-Kərimin Kəhf surəsində qeyd olunan Əshabül-Kəhf hadisəsində bir itin mövcudluğu da xatırladılır. Rəvayətlərdə həmin itin adının Kitmir olduğu bildirilir. Bəzi təfsir alimlərinin fikrinə görə, bu itin xüsusi bir istisna olaraq cənnətə daxil olacağı qeyd olunur. Lakin bu, bütün heyvanlara aid ümumi bir hökm deyil, yalnız bəzi təfsirlərdə qeyd olunan bir rəydir. Nəticə etibarilə demək olar ki, cənnət və cəhənnəm həyatı əsasən insanlara aid olan axirət mərhələsidir və heyvanlar bu mənada məsuliyyət daşıyan varlıqlar hesab olunmurlar".
Elmir Heydərli
13:01 03.03.2026
Oxunuş sayı: 715
