Süni zəka ilə təyyarə dizaynında inqilab: artıq saniyələr kifayətdir...
Yeni hazırlanmış süni zəka modeli təyyarə dizaynı prosesini əvvəlkindən qat-qat sürətli edir.
Müasir süni zəka texnologiyaları həm gündəlik həyatı asanlaşdırır, həm də vaxt və resurs tələb edən mürəkkəb layihələri daha tez və effektiv başa çatdırmağa imkan verir. PhysicsX tərəfindən hazırlanan yeni model, təyyarə dizaynı prosesini aylarla qısaldaraq sektorda inqilabi bir yenilik təqdim edir.
LGM-Aero: Təyyarə dizaynında yeni bir dövr
PhysicsX-in inkişaf etdirdiyi "LGM-Aero" modeli təyyarə dizaynını həm sürətləndirən, həm də optimallaşdıran bir süni zəka sistemidir. “Large Geometry Model” (Böyük Geometri Modeli) adlandırılan bu sistem, 25 milyondan çox fərqli geometri üzərində təlim keçmişdir.
Bu texnologiya, təyyarələrin dizaynlarını saniyələr ərzində analiz edərək aerodinamika, stabillik, struktur gərginliyi və digər fiziki xüsusiyyətləri sürətlə qiymətləndirə bilir. Üstəlik, yalnız mövcud dizaynları analiz etməklə kifayətlənmir, həm də istifadəçinin istəklərinə uyğun tamamilə yeni dizaynlar yarada bilir. Başqa sözlə, təyyarə mühəndislərinin xəyal etdiyi xüsusiyyətləri həyata keçirmək artıq daha qısa müddətdə mümkündür.
Yeni başlayanlar üçün Ai.rplane
PhysicsX yalnız peşəkar mühəndisləri deyil, aviasiya həvəskarlarını da nəzərə alıb. "LGM-Aero" modelinin sadələşdirilmiş versiyası olan "Ai.rplane", tamamilə pulsuz olaraq istifadəçilərə təqdim edilir. Bu, hətta yeni başlayanların belə bu texnologiya ilə təyyarə dizayn etməsinə şərait yaradır.
PhysicsX-in məqsədi nədir?
PhysicsX şirkətinin qurucularından Jacomo Corbo, bu texnologiyanın mühəndislik dünyasında inqilab yaratmaq potensialını vurğulayaraq belə deyib:
“Bu texnologiya saniyələr ərzində bir neçə fiziki parametrləri optimallaşdırma qabiliyyətinə malikdir. Mövcud simulyasiya sistemlərindən çox daha sürətli işləyir və eyni səviyyədə dəqiqlik təqdim edir.”
PhysicsX-in məqsədi yalnız təyyarələr deyil, həm də avtomobillər və digər sənaye məhsullarının dizayn proseslərini tamamilə dəyişdirməkdir.
Bu yenilik, texnologiyanın mühəndislik dünyasına təsirini daha da artıracaq və gələcəyin dizayn proseslərini yenidən formalaşdıracaq.
Sevinc Abuşova
15:15 05.12.2024
Oxunuş sayı: 13040
