Xarici xəbərlər
Kreml Trampa elə təklif göndərdi ki… - SİYAHI
Rusiya rəhbərliyi ABŞ Prezidenti Donald Trampın administrasiyasına iqtisadi əməkdaşlığın genişləndirilməsini nəzərdə tutan “Dmitriyev Planı” adlı sənəd təqdim edib.
Crossmedia.az xəbər verir ki, bu barədə "Bloomberg" nəşri məlumat yayıb.
Məlumata görə, sənəd yeddi əsas istiqaməti əhatə edir və ABŞ ilə Rusiya arasında bir sıra strateji sahələrdə əməkdaşlığın bərpasını və genişləndirilməsini təklif edir.
Planın əsas bəndləri:
Aviasiya sahəsi: Rusiyada istehsalın təşkili və Amerika şirkətlərinin mümkün iştirakı ilə Rusiya təyyarə donanmasının modernləşdirilməsi üçün uzunmüddətli müqavilələrin bağlanması.
Enerji sektoru: Neft və mayeləşdirilmiş təbii qaz istehsalı da daxil olmaqla, neft-qaz sahəsində birgə müəssisələrin yaradılması. Həmçinin nüvə enerjisi və süni intellekt istiqamətində əməkdaşlıq.
Xammal hasilatı: Litium, mis, nikel və platin kimi strateji metalları əhatə edən layihələrdə birgə fəaliyyət.
ABŞ şirkətlərinin geri dönüşü: Amerika şirkətləri üçün Rusiya istehlak bazarına qayıdışda güzəştli şərtlərin yaradılması.
Maliyyə sistemi: Rusiyanın enerji əməliyyatları da daxil olmaqla dollarla ifadə olunan ödəniş sisteminə qayıtması.
İqlim siyasəti: Çin və Avropa üçün üstün sayılan aşağı emissiya strategiyalarına alternativ olaraq qalıq yanacaqların təşviqində əməkdaşlıq.
Məlumata əsasən, təşəbbüs iki ölkə arasında iqtisadi münasibətlərin normallaşdırılmasına və strateji sahələrdə qarşılıqlı maraqların gücləndirilməsinə yönəlib. Rəsmi Moskva və Vaşinqton tərəfindən hələlik sənədlə bağlı əlavə açıqlama verilməyib.
09:17 13.02.2026
Oxunuş sayı: 1921
