İran ABŞ ilə danışıqların məkanının və formatının dəyişdirilməsini təklif edib.
Crossmedia.az xəbər verir ki, "Reuters" agentliyinin regional mənbəyə istinadən yaydığı məlumata görə, Tehran bu həftə ABŞ ilə planlaşdırılan danışıqların Türkiyədə deyil, Omanda keçirilməsini istəyib. Eyni zamanda İran tərəfi görüşlərin əhatə dairəsinin yalnız ikitərəfli dialoqla məhdudlaşdırılmasını və təkcə nüvə məsələsinə fokuslanmasını təklif edib.
Məlumata görə, cümə günü İstanbulda keçirilməsi planlaşdırılan görüşlə bağlı bu tələb ABŞ-nin Yaxın Şərqdə hərbi mövcudluğunu gücləndirməsi və bölgədə gərginliyin artması fonunda irəli sürülüb. Mənbə bildirir ki, regional aktorlar son həftələrdə böhranın dərinləşməsinin qarşısını almaq üçün fəal diplomatik səylər göstərirlər.
Qarşıdurma qarşılıqlı hava zərbələri ilə bağlı təhdidlər və münaqişənin genişlənə biləcəyi narahatlıqları ilə müşayiət olunur. Bu kontekstdə ABŞ ordusu çərşənbə axşamı Ərəb dənizində USS Abraham Lincoln aviadaşıyıcısına “aqressiv şəkildə” yaxınlaşan İran dronunun vurulduğunu açıqlayıb. Eyni zamanda ABŞ Prezidenti Donald Tramp razılaşma əldə olunmayacağı təqdirdə “pis nəticələrin” baş verə biləcəyi barədə xəbərdarlıq edib.
Mənbənin sözlərinə görə, Tehran danışıqların gündəliyini daraltmağa çalışır və yalnız Vaşinqtonla nüvə məsələsini müzakirə etmək niyyətindədir. ABŞ isə İranın raket proqramı və regiondakı proksi qüvvələrin fəaliyyəti kimi mövzuları da gündəmə gətirmək istəyir.
Ağ Evin sözçüsü danışıqların hələ də bu həftənin sonuna planlaşdırıldığını bildirib. Tehranda Xarici İşlər Nazirliyinin sözçüsü isə görüş yeri ilə bağlı müzakirələrin davam etdiyini, Türkiyə, Oman və bir neçə başqa ölkənin danışıqlara ev sahibliyi etməyə hazır olduğunu qeyd edib.
Daha əvvəl məlumatlı mənbələr İran xarici işlər naziri Abbas Əraqçı ilə yanaşı ABŞ-dən Kuşner və Uitkofun da görüşdə iştirak edəcəyini bildirmişdi. Lakin regional mənbəyə görə, Tehran indi danışıqların yalnız ABŞ–İran ikitərəfli formatında keçirilməsini istəyir.
