Ermənistanın ərazi idarəetmə və infrastruktur naziri David Xudatyan bildirib ki, ölkənin enerji sistemlərinin Türkiyə, Azərbaycan, İran və Gürcüstanla sinxronlaşdırılması real və mümkündür.
Crossmedia.az xəbər verir ki, nazir bu barədə "Sputnik Ermənistan"a müsahibəsində danışıb.
Onun sözlərinə görə, bu proses elektrik enerjisinin idxalı və ixracı baxımından kommersiya əhəmiyyətinə malikdir və eyni zamanda bütün enerji sisteminin dayanıqlılığını artırır.
Xudatyan qeyd edib ki, hazırkı mərhələdə sinxronlaşdırma üçün heç bir texniki maneə mövcud deyil, lakin prosesin başlanması ilə bağlı konkret vaxt çərçivəsi hələ müəyyənləşdirilməyib.
Nazir xatırladıb ki, 2025-ci ildə Türkiyəyə səfəri zamanı bu ölkənin energetika sahəsinə nəzarət edən nazir ilə görüş keçirib və regional enerji əməkdaşlığı məsələləri müzakirə olunub.
