İranın ali rəhbərinin müşaviri Əli Şəmxani zənginləşdirilmiş uran ehtiyatlarının ölkədən çıxarılması ilə bağlı yayılan məlumatları təkzib edib.
Crossmedia.az-ın məlumatına görə, o, “Əl-Məyadin” telekanalına müsahibəsində bildirib ki, nüvə materiallarının İrandan kənara daşınmasına ehtiyac yoxdur.
Şəmxaninin sözlərinə görə, uranın zənginləşdirmə səviyyəsi 60 faizdən 20 faizə endirilə bilər, lakin bu addımın “xərclərini ABŞ ödəməlidir”. O vurğulayıb ki, Tehran öz nüvə imkanları ilə bağlı birtərəfli güzəştlərə getmək niyyətində deyil.
Vaşinqtonla mümkün danışıqlara toxunan Şəmxani bildirib ki, İran ABŞ tərəfindən danışıqlar təklifləri almaqda davam edir. Onun sözlərinə görə, Tehran yalnız nüvə proqramı ilə bağlı mövzular üzrə ABŞ ilə danışıqlara hazırdır.
Müşavir həmçinin İran və ABŞ nümayəndə heyətləri arasında Türkiyədə mümkün görüşləri də istisna etməyib. Şəmxani qeyd edib ki, danışıqlar yalnız təhdidlərdən uzaq, qarşılıqlı hörmətə əsaslanan bir mühitdə aparılarsa, birbaşa və ya dolayı təmaslar mümkün ola bilər.
Əli Şəmxani əlavə edib ki, hazırda İran “B planı” mərhələsindədir və bu plan ölkənin təhlükəsizlik mərkəzlərini zəiflətməyə yönəlmiş, xaricdən dəstəklənən fəaliyyətlərə qarşı tədbirləri əhatə edir.
