Rusiya ordusu Rusiya ilə Ukrayna arasında enerji obyektlərinə dair faktiki atəşkəsin başa çatmasından sonra Ukrayna ərazisində genişmiqyaslı hava hücumlarını yenidən həyata keçirib.
Crossmedia.az bu barədə xarici mediaya istinadən xəbər verir.
Hücumlar ABŞ Prezidenti Donald Trampın zərbələrin dayandırılması ilə bağlı çağırışlarına baxmayaraq, bir neçə günlük fasilədən sonra bərpa olunub.
Məlumata görə, Ukrayna gecə boyu intensiv atəşə tutulub. Hücumlarda pilotsuz uçuş aparatları, ballistik raketlər, “Sirkon” hipersəs raketləri və X-22 tipli raketlərdən istifadə edilib. Ümumilikdə 350–500 arası dronun və 65-ə qədər müxtəlif tipli raketin buraxıldığı bildirilir.
İlkin zərbələr Kiyevdə İES-4-ü, Kiyev vilayətində Trypilska İstilik Elektrik Stansiyasını və Makariv qəsəbəsində yerləşən 750 kV-luq “Kiyevska” yarımstansiyasını hədəf alıb. Vinnitsa vilayətində Ladyjin İstilik Elektrik Stansiyasına, Dnepropetrovsk vilayətində isə Pridneprovsk İstilik Elektrik Stansiyasına zərbələr endirilib. Hücumlar nəticəsində özəl yaşayış sektoruna da ziyan dəyib.
Eyni zamanda Xarkov və Odessa şəhərlərində enerji infrastrukturu hədəfə alınıb. Dünən gecə həyata keçirilən hücumlar son həftələrin ən kütləvi zərbələri kimi qiymətləndirilir. Nəticədə Ukraynanın enerji infrastrukturunun bir hissəsi tam, bir hissəsi isə qismən sıradan çıxıb.
Zərbələr əsasən Kiyev, Xarkov və Dnepr rayonlarında yalnız istilik təchizatı üçün istifadə olunan birləşdirilmiş istilik-elektrik stansiyalarına (İES) yönəlib. Bundan əlavə, Rusiya ordusunun Polşa, Moldova və Ukraynanı birləşdirən ötürücü yarımstansiyaya da zərbə endirdiyi bildirilir. Bu hücumdan sonra Polşanın Rjeşuv və Lublin şəhərlərində, eləcə də Kişinyovun bəzi hissələrində elektrik enerjisinin verilişində fasilələr yaranıb.
Eyni zamanda Rusiya Xarici İşlər nazirinin müavini Sergey Ryabkov bildirib ki, ABŞ İranın nüvə proqramı ilə bağlı mümkün razılaşma barədə siqnallar göndərir, lakin Vaşinqtonun təklifləri mahiyyət etibarilə ultimatuma bərabərdir.
Son məlumatlara əsasən, Rusiya ordusu Rivne Atom Elektrik Stansiyasını Kiyev və Ukraynanın mərkəzi bölgələri ilə birləşdirən 750 kV-luq yarımstansiyaya da hücum edib. Hazırda Vinnitsa şəhərində yerləşən əsas 750 kV-luq yarımstansiyanın da zərbələrə məruz qaldığı bildirilir.
