Avropa Birliyinin xarici siyasət və təhlükəsizlik üzrə ali nümayəndəsi Kaya Kallas Rusiyanın hərbi fəaliyyəti ilə bağlı sərt açıqlama verib.
Crossmedia.az bu barədə xarici mediaya istinadən xəbər verir.
Onun sözlərinə görə, son yüz il ərzində Rusiya ən azı 19 ölkəyə hərbi hücum həyata keçirib və bu ölkələrin heç biri Rusiyaya qarşı hücum etməyib.
Kallas bildirib ki, mövcud beynəlxalq təhlükəsizlik vəziyyəti fonunda dünya ictimaiyyəti Moskvadan real və konkret güzəştlər tələb etməlidir. O vurğulayıb ki, bu güzəştlər ilk növbədə Rusiyanın hərbi büdcəsi, ordusunun sayı və nüvə arsenalına məhdudiyyətlərin qoyulmasını əhatə etməlidir.
“Biz Rusiya tərəfdən güzəştlər axtarmalıyıq – istər hərbi xərclər, istər ordu, istərsə də nüvə silahları məsələsində”, – deyə Aİ rəsmisi qeyd edib.
Kallasın bu açıqlaması Avropa Birliyinin Rusiyaya qarşı mövqeyinin daha da sərtləşdiyini və təhlükəsizlik məsələlərində kompromisslərin yalnız Moskvanın addımlarından asılı olduğunu göstərir. Açıqlama Ukrayna müharibəsi və artan qlobal gərginlik fonunda beynəlxalq rezonans doğurub.
