Səudiyyə müdafiə naziri xəbərdarlıq edib — Tramp geri çəkilərsə, Tehran güclənəcək
Səudiyyə Ərəbistanının müdafiə naziri, şahzadə Xalid bin Salman cümə günü Vaşinqtonda qapalı brifinqdə bildirib ki, əgər ABŞ Prezidenti Donald Tramp İrana qarşı səsləndirdiyi təhdidləri reallaşdırmasa, Tehran rejimi daha da cəsarətlənəcək.
Crossmedia.az xəbər verir ki, bu barədə "Axios" nəşri yazıb.
Məlumata görə, bu mövqe Səudiyyə Ərəbistanının son dövrdə eskalasiyaya qarşı ehtiyatlı çağırışları ilə ziddiyyət təşkil edir. Xatırladılır ki, cəmi üç həftə əvvəl vəliəhd şahzadə Məhəmməd bin Salman Trampa regional müharibə riskləri ilə bağlı ciddi narahatlığını çatdırmışdı və bu, Vaşinqtonun zərbə qərarını təxirə salmasının səbəblərindən biri olmuşdu.
Vəliəhdin kiçik qardaşı və yaxın müşaviri olan Xalid bin Salman, ABŞ-nin mümkün hərbi əməliyyatları və Tehranın “miqyaslı” cavab vədləri fonunda İranla bağlı məsləhətləşmələr üçün Vaşinqtona səfər edib. Ağ Ev rəsmiləri isə onun yekun qərarın verilmədiyini, diplomatik variantların açıq qaldığını vurğulayıblar.
Hazırda ABŞ ilə İran arasında ciddi birbaşa danışıqlar aparılmır. Amerika rəsmiləri Tehranın Vaşinqtonun maksimalist şərtləri ilə razılaşmaya maraq göstərmədiyini bildirirlər.
Cümə axşamı Xalid bin Salman Ağ Evdə Dövlət katibi Marko Rubio, müdafiə naziri Pit Heqset, Ağ Evin nümayəndəsi Stiv Vitkoff və Birləşmiş Qərargah Rəisləri Komitəsinin sədri general Den Keyn ilə uzunmüddətli görüş keçirib. Görüşün əsas mövzusunun ABŞ-ın İrana mümkün zərbəsi olduğu qeyd olunur.
Mənbələrin bildirdiyinə görə, Xalid bin Salman qapalı görüşlərdə Trampın həftələrlə davam edən təhdidlərdən sonra hərbi əməliyyata getməli olacağına inandığını, lakin eyni zamanda regional eskalasiya risklərinin azaldılmasının vacibliyini vurğulayıb. Onun sözlərinə görə, “əgər bu mərhələdə heç nə baş verməsə, bu, yalnız rejimi daha da cəsarətləndirəcək”.
Eyni zamanda, Səudiyyə Ərəbistanının rəsmi mövqeyi hələ də ehtiyatlı olaraq qalır. Məhəmməd bin Salman İran prezidenti ilə telefon danışığında krallığın ABŞ-nin İrana hücum üçün hava məkanından istifadəsinə icazə verməyəcəyini bildirib.
14:39 31.01.2026
Oxunuş sayı: 425
