ABŞ Rusiya ilə əlaqə kanalını aktivləşdirib
ABŞ ordusu Suriyadakı son hadisələrlə bağlı Rusiya ilə əlaqə kanalını aktivləşdirib.
Crossmedia.az bu barədə Pentaqonun sözçüsü Patrik Rayder açıqlamasına istinadən xəbər verir.
Rayderin sözlərinə görə, “Tərəflərin Suriyadakı coğrafi yaxınlığını nəzərə alaraq, səhv anlaşmaların qarşısını almaq məqsədilə Rusiya ilə mövcud “qaynar xətt”dən istifadə edilib”. O, sözügedən danışıqların detalları barədə məlumat verməsə də, bu mexanizmin potensial yanlış hesablamaların qarşısını almağa xidmət etdiyini vurğulayıb.
Xatırladaq ki, noyabrın 27-də “Cəbhət ən-Nusra” (Rusiyada qadağan olunub) qruplaşması Suriyanın şimalında genişmiqyaslı hücuma keçib. Suriya ordusunun məlumatına görə, terrorçular hərbi obyektlərə və ordunun mövqelərinə hücumlar təşkil edib.
Noyabrın 30-da Suriya ordusu, Aleppo şəhərinin müxtəlif məhəllələrinə sızmış terrorçulara zərbələr endirdiyini və əks-hücum üçün hazırlıq gördüyünü bəyan edib. Müdafiə Nazirliyi mülki əhalini və hərbçiləri qorumaq üçün qüvvələrin yenidən təşkil edildiyini bildirib.
Gültac Mehdizadə
05:24 03.12.2024
Oxunuş sayı: 16466
