Minneapolis atəşi Vaşinqtonu silkələdi: Tramp və komandası geri addım atır
ABŞ Prezidenti Donald Tramp və onun komandası ötən şənbə Minneapolisdə Sərhəd Mühafizə Xidməti əməkdaşları tərəfindən güllələnərək öldürülən Alex Pretty hadisəsi ilə bağlı ictimai rəy qarşısında açıq şəkildə uduzmağa başlayıb. Bu səbəbdən çərşənbə axşamı administrasiyanın yanaşmasında müəyyən dəyişikliklərin ediləcəyinə dair ilk açıq siqnallar verilib.
Crossmedia.az bu barədə xarici mediaya istinadən xəbər verir.
Rəsmilər gərginliyin bir qədər azaldılacağını desələr də, bunun tam geri çəkilmə olub-olmayacağı hələlik bəlli deyil. Minneapolisdə yerləşdirildiyi deyilən təxminən 2 min federal agentin sayının azaldılıb-azaldılmayacağı da açıqlanmayıb. Eyni zamanda, Pretty-nin ölümü ilə bağlı aparılacaq federal istintaqın necə və kimlər tərəfindən həyata keçiriləcəyi də sual altındadır. Şəhərdə istintaqın ədalətli aparılacağına dair demək olar ki, heç bir etimad yoxdur – Trampın verdiyi vədlərə baxmayaraq.
Tramp istintaqın “şərəfli və dürüst” aparılacağını bildirib və prosesi şəxsən izləyəcəyini deyib. Bununla belə, administrasiya daxilində bir sıra yüksək vəzifəli şəxslərin Pretty-ni “daxili terrorçu” və agentlərə qarşı kütləvi hücum planlaşdıran şəxs kimi təqdim etməsi ciddi tənqidlərə səbəb olub. Sosial şəbəkələrdə yayılan çoxsaylı mobil telefon videoları isə bu iddiaları təkzib edir.
Hadisədən sonra Tramp Minneapolisdəki ICE əməliyyatlarına rəhbərlik edən Greg Bovinonu vəzifədən uzaqlaşdıraraq onun yerinə cənub sərhədi üzrə xüsusi nümayəndə Tom Homanı təyin edib. Bildirilir ki, Homan daha çox cinayət keçmişi olan sənədsiz miqrantlara qarşı hədəfli əməliyyatlara üstünlük verəcək və Bovino dövründəki genişmiqyaslı, nümayişkaranə reydlərdən imtina ediləcək.
Tom Homan çərşənbə axşamı Minnesota ştatının qubernatoru və Minneapolis meri ilə görüşüb. Tərəflər görüşlərin müsbət keçdiyini və dialoqun davam edəcəyini bildiriblər.
Hadisə Tramp üçün başqa bir həssas məqamı da üzə çıxarıb. Alex Pretty silahı qanuni şəkildə daşıyırdı və silahdan heç vaxt atəş açılmadığı bildirilir. Trampı uzun müddətdir dəstəkləyən silah hüquqları müdafiəçiləri bunu problem saymır. Lakin Trampın Pretty-nin silahlı olmasını tənqid edən açıqlamaları bu qruplar arasında narazılıq yaradıb.
Respublikaçı müttəfiqlər isə Tramp administrasiyasını xəbərdarlıq edərək, bu hadisə ilə bağlı qarışıq və ziddiyyətli açıqlamaların hökumətin etibarlılığına ciddi zərər vurduğunu bildirirlər.
Sevinc Yarməmmədova
17:55 28.01.2026
Oxunuş sayı: 420
