Müharibənin kölgəsində turizm: ukraynalılar harada dincəlir?
2024-cü ildə ukraynalılar daxili turizmdə ən çox Karpat dağlarına üstünlük veriblər.
Ukrayna Turizmin İnkişafı üzrə Dövlət Agentliyinin rəhbəri Natalya Tabakanın mətbuat konfransında bildirdiyinə görə, həm yay, həm də qış mövsümündə Karpatlar əsas turizm istiqaməti olaraq qalır.
Onun sözlərinə görə, qış aylarında sakit Milad bayramı keçirmək və ya xizək kurortlarında dincəlmək istəyənlərin sayı xüsusilə artıb.
Tabaka İvano-Frankivsk, Lvov və Zakarpat vilayətlərini ən çox seçilən bölgələr sırasında qeyd edib. Eyni zamanda Kiyev ətrafı və Çerniqov vilayətində də xizək turizminə marağın olduğu bildirilib. Rəsmi şəxs sağlamlıq və uzunömürlülük yönümlü turizmə tələbatın da artdığını, tibbi və sağlamlıq xidmətləri təqdim edən otel komplekslərinin daha çox diqqət çəkdiyini vurğulayıb.
Bununla yanaşı, 22 yanvar tarixindən etibarən Ukrzaliznitsanın yenilənmiş qatar cədvəli qüvvəyə minib. Yeni qrafik çərçivəsində 118 uzun məsafəli, eləcə də 100-dən çox regional və şəhərətrafı qatar dəyişdirilmiş cədvəl üzrə hərəkət edir. Bildirilir ki, dəyişikliklər enerji çatışmazlığı və təhlükəsizlik səbəbindən yaranan gecikmələrin minimuma endirilməsi məqsədi daşıyır.
Səriyyə Tağıyeva
01:45 23.01.2026
Oxunuş sayı: 1014
