“Google” iki əməliyyat sistemini birləşdirir: “ChromeOS” və “Android”
“Google” gələcəkdə “ChromeOS” və “Android” əməliyyat sistemlərini birləşdirməyi planlaşdırır. Şirkətin bu addımı, “Apple”ın “iPadOS” ekosisteminə rəqib olmağa yönəlib. Yeni nəsil “Chromebook” modellərinin “Android”-lə dəstəklənən “ChromeOS” platforması üzərində işləməsi gözlənilir.
“ChromeOS” və “Android” üçün vahid platforma
Şirkət iki əməliyyat sistemini vahid platforma halına gətirmək istəyir. Bu yanaşma, “Google”-un əməliyyat sistemləri arasında daha sıx inteqrasiya yaratmaq məqsədini ortaya qoyur. Gələcəkdə çıxacaq “Chromebook” modellərinin tamamilə yenilənmiş “Android” platformasında işləməsi mümkündür. Bu, “Android”-in çoxlu tapşırıq və xarici qurğulara dəstək sahəsindəki yeniliklərindən maksimum yararlanmağa imkan verəcək.
Bu addımın əsas məqsədi “Apple”-ın “iPad” bazarındakı üstünlüyünə meydan oxumaq və daha vahid bir ekosistem təqdim etməkdir.
Süni intellektə böyük sərmayə
Eyni zamanda, “Google” süni intellekt sahəsinə yatırımlarını artırır. Şirkət, müxtəlif elm sahələrində süni intellektin tətbiqini sürətləndirmək üçün “DeepMind” layihəsinə 22 milyon dollarlıq vəsait ayırıb. Bu təşəbbüs, Demis Hassabisin rəhbərliyi ilə həyata keçirilir.
“Google”un vitse-prezidenti Meqqi Conson süni intellektin elmi problemlərin həllində mühüm rol oynayacağını və tədqiqatçıları dəstəkləməyə davam edəcəklərini bildirib.
Həm əməliyyat sistemlərində, həm də süni intellektdə atılan bu addımlar, “Google”-un texnologiya dünyasında yeni dövr yaratmaq istədiyini göstərir.
Sevinc Abuşova
08:33 30.11.2024
Oxunuş sayı: 8711
