Gürcüstanda siyasi böhran: etirazların nəticəsi nə olacaq?...
Gürcüstanda parlamentin hökuməti təsdiq etməsinə qarşı etiraz aksiyaları keçirilir. Paytaxt Tbilisidə parlament binası yaxınlığında nümayişçilərlə polis arasında toqquşmalar qeydə alınıb.
Gürcüstanın Baş naziri İrakli Kobaxidzenin Avropa İttifaqı ilə üzvlük danışıqlarını 2028-ci ilin sonunadək dayandırmaq qərarından sonra müxalifət tərəfdarları parlament binasının və hakim partiyanın mərkəzi ofisinin qarşısına toplanıblar.
Gürcüstan Prezidenti Salome Zurabişvili paytaxt Tbilisidə parlament binası qarşısında nümayişçilərə qoşulub və aksiyaçılara müraciət edərək deyib:
"Mən bu xalqla bir yerdəyəm. Bacardığım yerdə olacağam. Yeni seçkiləri alana qədər bitməyəcək müqavimət başlayır."
Bəs bu keçirilən aksiyalar nəticə verəcəkmi? Gürcü Arzusu Partiyası öz iqtidarını qorumağı bacaracaqmı?
Mövzu ilə bağlı politoloq Natiq Miri Crossmedia.az-a açıqlamasında bildirib:
"Bu gün Gürcüstanda baş verənlərin adı siyasi böhrandır və bu getdikcə daha ciddi bir hal almağa başlayır. Saxta seçkilər keçirərək parlamentdə hökuməti təsdiq etmək hər şeyin yaxşı olduğu mənasını vermir. Gürcü xalqının seçimi Avropaya inteqrasiyadan yanadır və hazırkı gürcü hakimiyyəti buna qarşı çıxır. Etiraz isə yalnız xalq səviyyəsində deyil, daha genişdir. Bu gün 200-dən çox gürcü diplomatı istefa ərizəsi yazıb. Bu diplomatlar indiyə qədər Gürcüstanın Avropaya inteqrasiyasını müdafiə ediblər. Ona görə bu gün Gürcüstanda çox böyük siyasi böhran yaşanır".
Prezidentin aksiyada etirazçılara qoşulmasına fikir bildirən Natiq Miri deyib:
"Prezidentin etirazları formal xarakter daşıyır. Çünki Zurabişvili Fransanın siyasi alətidir. Əgər o səmimi idisə və həqiqətən "Gürcü Arzusu" partiyasının məğlub olmasını istəyirdisə, zamanında özünün səlahiyyətində olan Saakaşvilini əfv edərdi. Bunu ona görə etmədi ki, Saakaşvili azadlığa çıxdığı təqdirdə onun kölgəsində qalacaqdı. Çünki Saakaşvili inqilabçıdır və xalqı arxasınca apararaq radikal qərarlar qəbul edə biləcəkdi. Lakin Zurabişvili hazırda Fransa və Avropanın mərhəmətindən nəsə umur".
Böhranın nəticələrini proqnoz edən politoloq qeyd edib: "Bu siyasi böhrandan çıxış yolu necə olacaq, onu yaxın perspektiv müəyyən edəcək. Ölkə tamamilə siyasi-iqtisadi cəhətdən iflic də ola bilər. Düşünürəm ki, hər şey hakimiyyətdən yox, gürcü xalqından asılıdır. Əgər gürcü xalqı "Gürcü Arzusu" iqtidarının qərarları ilə razılaşmazsa və bu etirazlar çoxalarsa, onda "Gürcü Arzusu"nun başqa perspektivi qalmayacaq".
Ayhan Ağarzayev
15:53 29.11.2024
Oxunuş sayı: 17827
