Kaladze: Gürcüstan Aİ-yə üzvlük məsələsində özünü şantaj etməyə imkan verməyəcək
Tbilisi meri və “Gürcü Arzusu” partiyasının baş katibi Kaxa Kaladze bildirib ki, Gürcüstan Aİ-yə üzvlük məsələsində özünü şantaj etməyə imkan verməyəcək.
Crossmedia.az xəbər verir ki, o, Aİ-nin tənqidlərinə və ölkə daxilindəki etirazlara cavab olaraq vurğulayıb ki, Avropa İttifaqı danışıqlara başlamaq istəsə, Gürcüstan hazırdır, lakin bu məsələdən təzyiq vasitəsi kimi istifadə olunmasına imkan verməyəcək.
Kaladze izah edib ki, Gürcüstanın üzvlük danışıqlarını 2028-ci ilə qədər təxirə salmaq qərarı inteqrasiya məsələsindən şantaj məqsədilə istifadə etmək cəhdləri ilə bağlıdır. O qeyd edib ki, Gürcüstan Aİ-yə “dilənçi” kimi deyil, ləyaqətlə və güclü iqtisadiyyatla daxil olacaq. Eyni zamanda o, ölkənin Aİ ilə assosiativ saziş üzrə öhdəliklərini yerinə yetirməyə davam edəcəyini vurğulayıb.
Bundan əvvəl Aİ-nin Gürcüstandakı səfiri Pavel Qerçinski Tbilisinin qərarından məyus olduğunu bildirərək, bunu növbəti dörd ildə Avropaya inteqrasiyadan imtinanın sübutu hesab edib.
Gültac Mehdizadə
12:56 29.11.2024
Oxunuş sayı: 14675
