Ərdoğan islam ölkələrini birgə hərəkət etməyə çağırdı
Türkiyə prezidenti Rəcəb Tayyib Ərdoğan “Qəzza zolağının gələcəyi” adlı Beynəlxalq Humanitar Yardım Sammitinin iştirakçılarına videomüraciətində İsrailin Qəzzada davam edən təcavüzünə cavab olaraq İslam ölkələrinin birliyinin vacibliyini vurğulayıb.
Crossmedia.az xarici KİV-ə istinadən xəbər verir ki, Ərdoğan qeyd edib ki, 2023-cü il oktyabrın 7-də hərbi əməliyyatlar başlayandan bəri Qəzzada 50 minə yaxın fələstinli həlak olub, onların əksəriyyəti uşaq və qadınlardır. 100 mindən çox insan yaralanıb. Ərdoğan vurğulayıb ki, Türkiyə İslam ölkələrinin birgə reaksiyasına və humanitar yardımın gücləndirilməsinə yönəlmiş diplomatik səyləri davam etdirəcək.
Qeyd edək ki, Türkiyə Fələstinə fəal dəstəyini davam etdirərkən Qəzzaya 86 min tondan, Livana isə 1300 tondan çox yardım çatdırıb. Ərdoğan əmin edib ki, işğala son qoyulması və müstəqil Fələstin dövlətinin yaradılması uğrunda mübarizə bu məqsədlərə çatana qədər davam edəcək.
Gültac Mehdizadə
12:26 29.11.2024
Oxunuş sayı: 12847
