Xarici xəbərlər

İran 2025-ci ilə qədər neft hasilatını artırmağı planlaşdırır

İranın neft naziri Möhsün Paknejad 2025-ci ilin mart ayına qədər neft hasilatını gündəlik 3,85 milyon barrelə çatdırmaq niyyətində olduğunu bildirib.

Crossmedia.az xəbər verir ki, hazırda ölkədə sutkada 3,4 milyon barel hasil edilir. Yataqların yenidən aktivləşdirilməsi və yeni quyuların qazılması hesabına artım planlaşdırılır ki, bu da 3 milyard dollar investisiya tələb edir.

South Azadegan, Yadavaran, Yaran və digər yataqların işlənməsi sutkada 56 min barel artımla əsas rol oynayacaq.

Uzunmüddətli planlara 2028-ci ilə qədər hasilatın sutkada 700-870 min barel artırılması, 15-25 milyard ABŞ dolları həcmində sərmayə qoyuluşu daxildir ki, bu da qurğuların modernləşdirilməsini, xarici tərəfdaşların cəlb edilməsini və yeni texnologiyaların tətbiqini nəzərdə tutur.

Qeyd edək ki, 2018-ci ildə ABŞ sanksiyalarından əvvəl İranda neft hasilatı sutkada 3,8-3,9 milyon barelə çatmışdı. İndi OPEK-in məlumatına görə, 2024-cü il üçün orta hasilat səviyyəsi sutkada 3,24 milyon barel təşkil edir.

Gültac Mehdizadə

🖨 Çap et

11:30 29.11.2024

Oxunuş sayı: 19914