İsveç Çini zədələnmiş kabellərlə bağlı əməkdaşlığa dəvət edir
İsveç, Baltik dənizində iki kabelin zədələnməsi ilə bağlı Çindən araşdırmada əməkdaşlıq tələb edib. 17-18 noyabrda İsveçin ərazi sularında Litva və Almaniya ilə əlaqəni təmin edən kabellər sıradan çıxıb. Həmin vaxt ərazidə Çinə məxsus "Yi Peng Three" gəmisinin olduğu ehtimal edilir.
Crossmedia.az xarici KİV-ə istinadən xəbər verir ki, Çin sabotaj iddialarını inkar edib və İsveçlə əməkdaşlığa hazır olduğunu bildirib. Gəmi izləmə məlumatlarına əsasən, gəminin kabelləri lövbərlə bilərəkdən zədələdiyi ehtimal olunur. Hazırda gəmi Danimarka sahillərindədir və Danimarka donanması tərəfindən izlənilir.
İsveç baş naziri Ulf Kristersson Çinə rəsmi müraciət etdiklərini və gəminin İsveç sularına qayıdaraq araşdırma üçün yoxlanılmasını istədiklərini deyib. Çin əməkdaşlığa hazır olduğunu təsdiqləyib.
Baltik dənizindəki gərginlik, 2022-ci ildə “Şimal axını” kəmərlərindəki partlayışlardan sonra daha da artıb. Almaniya müdafiə naziri Boris Pistorius kabellərin qəsdən zədələndiyini düşündüklərini qeyd edib, lakin heç kəsi günahlandırmayıb. Rusiya isə bu iddiaları rədd edir.
Elnurə Kərimova
11:12 29.11.2024
Oxunuş sayı: 6183
