"Microsoft Office" tətbiqləri süni intellekt təlimində istifadə edilir - İDDİA
"OpenAI"ın "ChatGPT" kimi süni intellekt tətbiqlərini istifadəyə təqdim etməsindən sonra onun ən böyük dəstəkçisi və investoru olan “Microsoft”, xüsusilə Windows sistemlərindəki Copilot daxil olmaqla, süni intellekti bir çox sahədə istifadə edir. Süni intellektin əsas prinsipi mövcud məlumatlar üzərindən təlim alan bir sistemə əsaslanır. Bəs, Microsoft-un Office tətbiqləri süni intellekti öyrətmək üçün istifadə olunurmu?
Son zamanlarda Office tətbiqlərinin sahibi olan “Microsoft”, Connected experiences yəni, bağlantılı təcrübələr funksiyasını avtomatik olaraq açıq saxlayacaq yeniləməni təqdim edib. İstifadəçilər bu funksiyanı istəmirlərsə, əl ilə deaktiv etməlidirlər. Bu xüsusiyyət vasitəsilə ana şirkət olan “Microsoft”, Microsoft 365 və ya digər adı ilə Office tətbiqləri daxilində bir çox məlumatı toplaya bilir. Bu vəziyyət, istifadəçilərin kəskin reaksiyasına səbəb olub və bəzi istifadəçilər bu məlumatların OpenAI-ın GPT süni intellektini öyrətmək üçün istifadə olunduğunu iddia ediblər.
“X” (keçmiş Twitter) platformasında bir istifadəçi paylaşımında bildirib ki, “Microsoft Office, son aylarda bir çox şirkət kimi daxili süni intellekt sistemlərini təlimləndirmək məqsədilə Word və Excel sənədlərinizi tarayan bir ‘çıxış’ funksiyasını gizli şəkildə aktivləşdirib. Bu ayar varsayılan olaraq açıqdır və deaktiv etmək üçün bir qutunun işarəsini əl ilə silməlisiniz. Əgər MS Word-dən blog yazıları, romanlar və ya müəllif hüquqları ilə qorunmağı və/və ya satılmağı düşündüyünüz hər hansı digər işlər üçün istifadə edirsinizsə, bu funksiyanı dərhal bağlamağınız məsləhətdir.”
Bu paylaşımın ardından “Microsoft” rəsmi açıqlama verərək bildirib ki, “M365 tətbiqlərində LLM-ləri (böyük dil modellərini) təlimləndirmək üçün müştəri məlumatlarını istifadə etmirik. Bu ayar yalnız sənədi birgə yazmaq kimi internet bağlantısı tələb edən funksiyaları aktivləşdirir.” Buna baxmayaraq, bu ilin əvvəlində “Microsoft”-a məxsus LinkedIn platformasında süni intellektin təlimi üçün istifadəçi məlumatlarını toplayan bir xüsusiyyətin varsayılan olaraq açıq saxlandığı üçün şirkət araşdırmaya məruz qalmışdı.
Bağlantılı təcrübələr funksiyasını bağlamaq istəyirsinizsə, bunu aşağıdakı addımlarla edə bilərsiniz:
Fayl > Seçimlər > Təhlükəsizlik Mərkəzi > Təhlükəsizlik Mərkəzinin Ayarları > Məxfilik Seçimləri > İxtiyari Bağlantılı Təcrübələr > “İxtiyari bağlantılı təcrübələri aktivləşdir” seçiminin işarəsini silin.
Emil Nağızadə
08:16 29.11.2024
Oxunuş sayı: 16942
